توقعات. ها شكون اللي منطقيا مرشح لخلافة بوسعيد على المالية والاقتصاد؟: اخنوش او لقجع او العلمي

اقالة محمد بوسعيد المفاجئة والغريبة من منصبه كوزير للمالية والاقتصاد خلات هاد المنصب خاوي. شكون يمكن يكون فيه. اولا هاد المنصب غادي يبقى عند حزب التجمع الوطني للاحرار حقاش بوسعيد كان منهم. يعني ان الوزير المقبل غادي يكون تجمعي.
فتشكيل الحكومة كان اسم مرشح لهاد المنصب يتعلق الامر بفوزي لقجع مدير مديرية الميزانية بوزارة المالية واللي مع الحزب. غير تعيينو دابا غادي يضر المغرب اكثر ما ينفعو. ماشي على كفاءتو ابدا. حقاش فمنصبو غادي يديرو مزيان لانو كيعرف خبايا هاد الوزارة اكثر من الوزير نفسو ولكن حقاش منصبو اليوم كرئيس للجامعة الملكية المغربية لكرة القدم غادي يضر اللي بناه هادي عامين فالقارة الافريقية. راه ماشي غير جي وتأهل لكأس العالم بعد ما كنا ما قادرينش نتاهلو لكأس افريقيا وماشي غير جي وخود منصب مكلف بمالية الكاف راه منصب اهم بكثير للبلاد من وزير المالية فهاد الفترة.
المرشح اللي كيبان خاصو يشرف على المالية هو وزير الفلاحة والصيد البحري. علاش؟ حقاش سبق ليه خدا هاد المنصب باش استاقل وزير المالية ديال حكومة بنكيران الاستقلالي نزار بركة ووجه الميزانية. ثم صعيب للحزب يدخل شي حد اخر فمنصب بالغ الاهمية والحساسية. المشكلة الاخرى هو ان وزير المالية فالتراتبية البروتوكولية اهم من وزير الفلاحة لذا فالجمع منهم غادي يحل هاد المشكلة ولو ثانوية ولكن عندها اعتباراتها.
ثم ان اخنوش فقطاعي الفلاحة والصيد البحري كلشي المشاريع غادية يعني ان اشرافو عليهم ما كيطلبش نفس الوقت كيف قبل وعليه الحاق المالية بيه والاقتصاد بوزارة مولاي حفيظ العلمي التجارة والصناعة والاستثمار يبدو امرا معقولا