عمدة مدريد لي من أكثر المدافعين على البوليساريو ضربات كولشي فالزيرو وحضرات لإحتفالات عيد العرش لي دارتها السفارة المغربية

مانويلا كارمينا، عمدة العاصمة مدريد لي كتعتابر من أشد المدافعين على جبهة البوليساريو وكتعتابر المغرب مستعمر للصحرا، باين أنها بدلات هادشي كولو، ومابقاتش تعادي المغرب بالطريقة لي كانت سابقا.
عضوة حزب بوديموس لي كولو كان كيمشي فتوجه البوليساريو من نهار كان هاد الحزب حركة إحتجاجية، بدلات هادشي بسباب حضورها في إحتفالات عيد العرش، وهادشي حسب ما قالت صحيفة « إل كونفيدينسيال » الاسبانية، لي أشارت أن العديد من أعضاء الحكومة وكبار المسؤولين الاسبان، لبوا نداء كريمة بنيعيش، سفيرة المغرب بإسبانيا وحضروا لإحتفالات عيد العرش لي دارت فأحد فنادق العاصمة، وهادشي كان متوقع وعادي، لكن تضيف الصحيفة ، غير العادي هو أن مانويلا كارمينا تحضر لاحتفالات عيد العرش.
وزادت الصحيفة أنه حتى لمغاربة تصدموا ملي شافوا كارمينا داخلا عندهوم هي وراجلها، لأن حضورها كان غير متوقع البتة، وهي المعروفة بعداءها للمغرب بسباب قضية الصحرا.
المغرب كان متخوف هادي شحال من صعود نجم بوديموس في إسبانيا، لكون هاد الحزب يعادي المغرب كثيرا، لكن يبدوا أن الحزب ملي رجع فالسلطة فهم أن الديبلوماسية حاجة أخرى لا علاقة لها بالشعارات لي كتقال فالاحزاب، وأن المغرب لاعب أساسي فالمنطقة مايمكنش تفتح معاه جبهة صراع وإلا غايخسرو الطرفين أكثر مما غايربحو.