تنفرد بنشرها "كود" سلسلة "كيفاش السلاطين ديال المغرب كايشوفو "ريوسهوم" وكايشوفو السلطة ديالهوم وكايحميوها؟ !" مرحلة الرؤية السياسية الوضعية والحداثية للتدبير السياسي… على مستوى الاستقالة الفعلية لعلماء الدين من الحياة السياسية (3). ح 147

انسحاب ديال الفوقاها من الحقل السياسي خلق فراغ كبير في الحياة السياسية الدينية المغربية للي كانت دائما مبنية على تحالف الفقيه والسلطان في التدبير السياسي. وهو فراغ للي زاد تعمق بفعل تظافر عوامل داخلية وخارجية للي خلات النظام السياسي المغربي يرجع بقوة ابتداء من عام 1970 لاستعمال وتسخير الخطاب الديني والتقليدي وبالتالي إلى ممارسة تقليدانية للسلطة…
فيما يتعلق بالعوامل الداخلية، فبالإضافة إلى الفراغ الإيديولوجي/الديني الناتج عن خروج مؤسسة الفقهاء من الحقل السياسي، هناك الأحداث السياسية والاجتماعية للي عرفها المغرب بين عام 1965 و1970…من هاذ الأحداث يمكن ليا نذكر انتفاضة الدار البيضاء في 23 مارس 1965 وللي بيينات بالملموس أن هناك فراغ مؤسسي وحزبي تووجو الماليك بالإعلان على حالة الاستثناء للي خلق فراغ سياسي غادي يدوم حتى لعام 1970…
أما الأحداث الخارجية فتجسسدات في فقدان الأنظمة العربية القومية للحظوة للي كانت كاتتمتتع بيها بعد الهزيمة للي تلققاتها في حربها مع إسرائيل، وللي كان عندها تأثير كبير على الأحزاب المغربية للي كانت قومية حتى للنخاع، وخللات الشباب المثقف يغادرها ويدخل غالبا في النضال السياسي السري داخل منظمات غير شرعية…وكان من الطبيعي أن هاذ الشباب يلتاجأ للإيديولوجيات الشيوعية والماركسية خاصة في ظرفية دولية مطبوعة بالحرب الباردة بين المعسكرين الرأسمالي والشيوعي، وتواجد أنظمة شيوعية عندها جاذبية بالنسبة الشباب بحال النظام "الكوبي" أو "النظام الصيني"…
هاذ الشباب للي غالبيتو كان في الجامعات، اضطر أنه يدخل في العمل السياسي "السري"، وخلق خلايا كانت موجودة في الجامعات وحتى بين العمال والحرفيين…وكان الشعار ديالهم بيطبيعة الحال هو "إسقاط النظام الملكي الرجعي" في القوت للي الأحزاب الموجودة وخاصة المنعوتة "تقدمية" عجزات على تحقيق أدنى شروط الحياة الديمقراطية في البلاد نتيجة تواطؤها معا المؤسسة الملكية…بحيث أن تبعيتها للأنظمة "القومجية" العربية بحال مصر وسوريا والعراق، أفقدها كل مصداقية، وبالتالي أفقدها حتى مصداقيتها في العمل السياسي الداخلي من أجل فرض نظام ديمقراطي أمام تحكم المؤسسة الملكية في جميع المؤسسات الموجودة…
هاذ الخلايا كانت بالطبع منضوية تحت مسميات متعددة كولها ذات منحى إيديولوجي ماركسي/لينيني أو ماوي أو طروتسكي، وكان غارق في الطوباوية نظرا للاندفاع الشبابي ديال صحابو…وفي نفس الوقت، هاذ الجو كولو شججع ناس متطرفين في الاتحاد الوطني للقوات الشعبية أنهم يفضضلو النهج الانقلابي في تواطؤ تام معا مصر جمال عبد الناصر والقومجيين "العرب"، بحال الحركة للي كان كايقودها المرحوم "الفقيه البصري" من الخارج وللي أددات في بعض الأوقات إلى محاولات تمردية وانقلابية فشلات فشل ذريع نظرا لأنها ماوجداتش سند من طرف السكان خاصة في العالم القروي والبربري..
أمام هاذ التطرف للي دخلات فيه التنظيمات الشبابية وحتى بعض الأحزاب القومية المغربية، وجدات السلطة نفسها مضطرة حتى هيا للتطرف، ولكن في الاتجاه المعاكس، أي في اتجاه التقليد والتقليدانية والإديولوجية الإسلامية…