ودابا حيدو القضاء وديرو محاكم شعببة وعيطو على مول شي تخربيقة يكون قاضي. مشكلة بنت اخشيشن ماشي مع القضاء واللي دارو عين العقل والباقي كيحركها احقاد طبقية وصافي

عقلتو على حمزة الدرهم اش وقع ليه بعد الحادثة الشهيرة. السيد صدق مدوز حكم ابتدائي ودخل للحبس غير باش يمصو غضب مغاربة الفايس فالاول وولى غضب عام. حتى حد ما داها فالقانون حتى حد ما داها فدولة الحق والقانون كلشي بغى ينتاقم حقاش راكب على فيراري. باش القاضي فالاستثئناف حكم ببراءتو ناضو ليه كيسبوه كيهاجموه. شفتو فين وصلنا.
اليوم مع كنزة بنت احمد اخشيشن رئيس جهة مراكش تانسيفت كنعيشو وضعا مشابها. اكيد شي حد باغي الخدمة فيه ولقى بنتو حيط طل منو باش يصفي حساباتو معاه. اييه القضية فيها مشكلة ولكن القضاء حكم بما قدمت له من معطيات.
المشكلة ماشي قضائية يمكن تقولو اخلاقية واخا كلمة ما كتعجبش بزاف. يمكن تقولو فشوش يمكن تقولو علاش السياسيين كياخدو طونوبيلاتهم لديورهم وخاص قانون ينظم هاد الشي. كلشي ممكن يتناقش وكلها وموقفو ولكن ماشي حقاش بنت رئيس الجهة خاصها تشد فالحبس باش شعيبة يكون فرحان ويحس باللي كاينة عدالة. راه القاضي حكم. ما كانتش خسائر فالارواح. صحاب البوطو اللي هو مجلس العاصمة الرباط من حقو يتابع باش يتعوض ولكن ماشي بالاكراه البدني الى ما كانش اضرار.
اخشيشن بان فهاد الفيلم باللي بزاف اللي عاينو فيه. بنتو كانت هي التبن باش ياكلوه ويساليو معاه. علاش؟ سؤال كبير ما عندنا جواب عليه.
المشكلة اللي كانت فهاد لكسيدة هي طونوبيلة الدولة ماشي حاجة اخرى والبنت اللي دارت لكسيدة. لكن القاضي خاصو اشادة حقاش ما داهاش فهاد الشي اللي واقع. هاد الناس اللي كيتمناو لبنت اخشيشن الحبس كيبارطاجيو فيديوات ديال شي قاضي فامريكا كيبان انساني بزاف فاحكامو فقضايا عندها علاقة باطفال او قاصرين. حقاش كيخدم عقلو كينتاصر للقانون ولروح القانون.
هاد الاحكام الشعبية او الادانات الشعبية راها خطر على لبلاد. خطر على القضاء. خطر على دولة الحق والقانون.