التجنيد الإجباري حاجة زوينة ويمكن يتعلم منها الفرد شلا حاجات وتعاونوا فحياتو، ولكن التجنيد الإجباري في بلاد المسؤولين ديالها كيسيروها بحال شي مرتزقة راه غير عبث، خاص تنظابط الدولة معانا كشعب هي اللولة بعدا

في البدء كيكون عندك شباب بطاليين ممكملينش قرايتهم تالفة بيهم الوقت معندهومش سوابق غير حيت باقي ماطاحتش الورقة ، أما كون كانو كيشدو غير على التحرش الجنسي تلقاه شابع حبس، من بعد التجنيد الإجباري كيولي عندك شباب بطاليين ممكملينش قرايتهم تالفة بيهم الوقت، ولكن كيعرفو للسلاح وعندهم تدريب عسكري ولكن باقي ساخطين على الوضعية وباقي الأفق والمستقبل مجهول قدامهم، وباقي نفس الاوضاع الإجتماعية والإقتصادية لي خلات منهم شباب ماقاري ماخدام، إذن عادي أننا نشوفوا نتيجة بحال هاد القرارات هي شباب فالشارع ساخط ولكن مؤهل لأنه يخوض صراع عسكري، وهادشي لي وقع فسوريا وليبيا حيت كان عندهم الشعب كلو مدوز التجنيد الإجباري وكيعرف للسلاح.
طبعا ماشي أي بلاد فيها التجنيد الإجباري كتعني مباشرة راه غادي ينوض فيها شي صراع مسلح، كاين دول كثيرة متقدمة ومن احسن دول العالم بحال الدول الإسكندنافية وبحال كوريا الجنوبية لي فيهم التجنيد الإجباري، ولكن هادو دول قبل مايتجند فيها المواطن الدولة تجندات لاصلاح البلاد ولمحاربة الفساد وللنهضة الإقتصادية عاد تجندو معاها المواطنين للحفاظ والدفاع على هاد المكتسبات لي حققوا هوما والدولة، ولكن فالحالة ديال المغرب بلاد لي يوميا مواطنيها كيحاولو يهربو منها بطرق شرعية وغير شرعية وبكاع فئاتهم بالقاريين والاميين والفقراء ولي لاباس عليهم، والناس لي فيها بزاف منهم كيحسو براسهم غير حاصلين فيها وصافي، وتجي تفرض عليهم التجنيد الإجباري باش يدافعو على وطن مكرهوش يخويوه فأقرب فرصة فراه العبث هذا.
راه الدولة لي خاصها تدوز التجنيد الإجباري باش تتعلم الإنظباط والفعالية فتسيير هاد البلاد، وخاص التجنيد لمحاربة الآفات لي خرجوا على البلاد ولي سببوا فملايين ديال الشباب لي مكيدير تاحاجة فحياتو ومافايد راسو مافايد واليديه مافايد الدولة، التجنيد الإجباري حاجة زوينة ويمكن يتعلم منها الفرد شلا حاجات وتعاونوا فحياتو، ولكن التجنيد الإجباري في بلاد المسؤولين ديالها كيسيروا البلاد بحال شي مرتزقة وغادين غير مع الرابحة، وهوما سباب هاد الكوارث لي كنعيشوا ونهار حرافت ليهم يجيو يجندو ولاد الشعب من أجل يتعلموا الإنظباط فراه هادشي غير عبث،
خاص تنظابط الدولة معانا كشعب هي اللولة بعدا.