راه من الخطأ أننا نرميو كاع المسؤولية على هاد القاصرين الجانحين ونبداو نهدرو على نوع العقوبات لي خاص تمارس ضدهم. اللي خاص يتعاقب فالمجتمع هما واليديهم والأساتذة والمسؤولين

واش زعمة هاد الجيل صافي غلب المجتمع وأصبح من المستحيل ردعه ، حيث على مايبدو من خلال جرائم القاصرين بانواعها ولات كتدير ضجة كبيرة فالمجتمع وكتسبب فتكون رهاب مجتمعي من هاد الفئة ، لدرجة ها لي كيبقى يبكي على عهد البصري والحسن التاني ، ها لي كيبدى يسب فحقوق الإنسان وكيعتابرها ماصالحاش فالمغرب ، ونتيجتها هي هاد الضصارة ديال البراهش لي ولات طاغية فالمجتمع ، ها لي كينادي بالتجنيد الإجباري، وقليل لي كيتسائل شكون هاد البراهش اصلا واش ماشي نتاج هاد المجتمع بكل مساوئه ، واش ماشي هوما الزرع لي عطات الزريعة لي تزرعات فهاد البلاد، لذا اذا كانو فاسدين فراه من فساد المجتمع ككل ، حيث هوما ماشي كائنات دخيلة بل من صلب هاد البلاد.
العنف والحكرة والتسلط ، ولي فشي مركز سلطة كيتعنى بيه، هادي سمة أساسية فهاد المجتمع وهي القاعدة ومن غيرها إستثناء ، بداها من سيكوريتي لي فباب أي إدارة ، وصولا للمسؤولين لكبار، شي حاكر شي حتى لعند مول شي ، وبعد المرات كيتمرد شي واحد على الوضع السائد والنتيجة كتكون بحال آش وقع للأستاذة لي تضربات فكازا، هاداك التلميذ يقدر يكون حالة ميؤوس منها ، ولكن السلوك العدواني والإنتقامي لي دار ، راه ماجايش من فراغ ، وماشي سلوك انسان عادي كبر معتز بذاته ، وانما سلوك جانح رتاكب جريمة حيث بالنسبة ليه تمارسات عليه الحكرة ونتاقم ، طبعا هادشي ماشي مبرر للجريمة الشنيعة لي قام بيها، ولكن هذا مكيعنيش أنه هو المسؤول الوحيد عليها ، حيث احتمال قليل جدا أنه يكون تلميذ مرتاح فالمدرسة وينوض يحنك أستاذة غير هكاك بدافع محاربة الملل ، هادشي كيطرى فالمجتمعات المتقدمة لي كتعاني من الضجر ، أما حنا راه مجتمع بدائي حتى فالجريمة ، وجرائمنا عندها دوافع بسيطة ومغرقة فالقدم ، وممحتاجاش تحليلات خارقة.
راه من الخطأ أننا نرميو كاع المسؤولية على هاد القاصرين الجانحين ونبداو نهدرو على نوع العقوبات لي خاص تمارس ضدهم ، حيث إلى كان خاص شي حد يتعاقب فالمجتمع فراه هو واليديهم والأساتذة لي قراوهم والمسؤولين لي موفرو ليهم حتى شي شروط باش يطلعو أسوياء ، حنا قدام جيل خارية عليه وكاين شرخ كبير بينو وبين أبناء الطبقة الوسطى وما فوق ، الدولة تخلات على كولشي ، وهاد القاصرين لي واليديهم بيخير عليهم راه عوضوا الدولة وعناو بيهم ووفروليهم شروط العيش الكريم ، والطبقات الشعبية المسحوقة راه ولادها خرجوا للشارع والإجرام والفراشات والهجرة السرية ، ونهار كاع كيوصل شي واحد فيهم فراه كيتخشى فشي وظيفة عمومية من بينها التعليم ، وكيبدى يبروفيتي فالدولة بحال الى كيرد الغعتبار لراسو من خلالها ، وكتعاود السلسلة ديال جيل ضايع وكيضيع معاه جيل آخر .