الدخول المدرسي: مناسبة لهتك عرض الاسر المتوسطة !و سير قلب ليه نتا على غلاف بنفسجي و كوز و قلم رصاص من ماركة كذا و كذا و منجرة على شكل قنية…و هادا بغا دفتر بدون سلك و هذا بغا دفتر بالسلك

فاش كانقرا الصحافة الفرنسية كانلقاها كلها هاد الايام كاتهضر على الدخول المدرسي و حتى فالتلفزة برامج على الدخول المدرسي …شنو دار ! شنو غايدار ! الكالوندييي ديال العطل ! التغييرات لي كاينة فالقوانين … كاتحس بالدولة و المجتمع كلهم مجندين لهاد الحدث المهم ديال الدخول المدرسي ! وا شنو ؟ علاه ماشي المدرسة هي لي خرجات الانسان من ظلمات الجهل لنور العلم.
حنا عندنا الدخول المدرسي كايدوز كئيب فالاعلام الرسمي و عامر بديك الهضرة الغليضة لي ماكاتنفع ماكاضر حيت العام لي جا كايلقانا كانهضرو على المخططات و الاستراتيجيات و اصلاح التعليم و المحافظ و الطرونسبور فالبوادي و بالرغم من هادشي كلو عام على عام التعليم غادي و كايتدهور و لحد الساعة ماكايبانش ليا انا شخصيا شي ضو غايخرجنا من النفق، هادشي من جهة.
من جهة اخرى ! الدخول المدرسي ولا بصح فيلم ديال الخليع كايعيشوه الاسر و خصوصا الاسر المتوسطة لي كاتقري ولادها فال”بريفي” ! اسر مكونة من موظفين و أطر و مدراء … ناس كاتنتف ليهم الدولة طرف مهم من الصالير ديالهم كل شهر ولكن بالمقابل ماكايستافدو لا من تعليم لا من صحة و أي حاجة بغاوها خاصهم يخراو ليها الفلوس و المدرسة على رأس الهواجس.
و طبعا حيت زريبة ! أغلب المدارس الخاصة دايرة فالباشار مابغات ! ماكاين غا گزر ليا فبنادم ! فلوس الشهر ! فلوس لاصورانص ! فلوس الادوات المدرسية ! فلوس الخرجات ! لافونص ديال شهر شتنبر كايشدوها هوما فشهر ماي و ابريل قبل مايسالي العام فحالا مريزيرفي الطبالة و الغياطة يديو ليك الدفوع.
و طبعا باش تهزو القالب مزيان أخي الأب المغربي أختي الأم المغربية كايدردرو ليكم شوية ديال الفرونسي و اللغات على داكشي لي غايقراو ولادكم ! زعما راه صافي غير خسرو فلوسكم و ماضربو حسبة راه غانخرجوه ليكم طبيب و لا رائد فضاء.
گاع الآباء لي كانعرف و لي حاطين ولادهم فالبريفي كايشكيو ! كلهم كايحسو براسهم مغتصبين من طرف أرباب المدارس الخاصة من الكوافورة ديالي لي كاتحيد الف درهم من جوفها كل شهر باش تقري ولدها حتى للمدراء لي كانعرف و لي بالرغم من صاليراتهم المهورة ماقادينش على مصاريف المدرسة!
و كون كانت بعدا غير بشي ربح ! كون كان غا قد الفم قد الدراع و كون كانت بعدا غير الجودة مضمونة ! اغلب الاسر لي حاطة ولدها فمدرسة خاصة كاتلقا راسها خاصها تقيدو تا فالسوايع ! و بالاضافة للسوايع طبعا خاصها تبع معاه فالدار و تقرا معاه و دير معاه الواجبات المدرسية ! و بالرغم من هاد تامارا كلها ماعمرنا كانشوفو شي مخترع خرج من هاد السيستيم ! و لا شي رائد فضاء و لا شي عالم ! أقصى ماكاينتجو هاد السيستيم الفاشل هوا طبيب و مهندس و محامي و مجموعة من المهن لي طبعا ضرورية و لكن فدول اخرى ماكاتستاحقش گاع هاد المجهود و خسران الفلوس.
ولكن سركم ! سر أي واحد كايتم هتك العرض ديالو من طرف المدارس الخاصة و ساكت و ضارب الطم و كايبكي كي القحبة.
حيت عوض ماتكونو جمعيات آباء لي يكون عندها قوة تقريرية و لي دافع عليكم و على مصالحكم قدام المدارس الخاصة ! كاتحدرو گماگمكم و تخلصو الفلوس و نتوما كاتگمگمو ” هادشي غالي علينا بزاف” !
ايه هادشي غالي و غايبقى غالي ! و عام على عام غايزيدو المدارس الخاصة يغلاو ! و غايفرضو عليكم شروط جزافية و يهبطو ليكم گراصنكم ! و يشرطو عليكم تشريو عشرين دفتر لدري غايدخل للتحضيري و طناشركتاب و عشرين ستيلو و محفظة ثقيلة فحالا غايصنع اليورانيوم ! بل كاينين لي كايشرطو على الآباء الماركة ديال قلم الرصاص لي خاصو يشريها للبزغوط ديالو ! آه نعام آ سيدي !
و سير قلب ليه على غلاف بنفسجي و نصف دائرة و كوز قلم رصاص من ماركة كذا و كذا …و هادا بغا دفتر بدون سلك و هذا بغا دفتر بالسلك و هاد الاستاذة تشهات اوراق مزدوجة سوداء و لخرى كاتوحم على اوراق مزدوجة برتقالية تميل الى الفستقي ! و ها لي بغا الدفتر بمربعات كبيرة و هالي بغاه بمربعات صغيرة ! و كاين شي استاذات كايصحاب راسها كاتختار الالوان باش غادير السفيفة للجلابة ( غلاف اخضر غامق لدفتر التحضير و غلاف اخضر فاتح لدفتر التمارين…) و مانجيبوش معاهم شي ثلاتة ميترو ديال الجيم فالحميمر ديريه قفيطن عين و عقدة من الفوق تال لتحت آ أستاذة ؟
هادشي كايتسمى بالعربية تاعرابت التقحبين ! كايتسمى الاهتمام بسفاسف الامور ! كايتسمى التنمييك على عباد الله و لكن كانعاود نقول لي عطا زكو لهلا يفكو فهنيئا لكم اخواني اخواتي بتهبيط الگرصون و كل عام و أنتم مكوزين للمدارس الخاصة.