اليوم يقدم لفتيت اللوك الجديد للمبادرة الوطنية للتنمية البشرية. بعد فشلها:واش غير الزواق ولا شي تغيير بصاح

يتوقع ان يطلق الملك محمد السادس اليوم الاربعاء 19 شتنبر 2018 النسخة الجديدة المنقحة من المبادرة الوطنية للتنمية البشرية. هاد الشي وفق مصدر “كود” غادي يقدمو وزير الداخلية عبد الوافي لفتيت.
جا اطلاق هاد المبادرة بعد الفشل مرة اخرى ديال هاد المبادرة باش تعطي للمغرب رتبة مقادة فمؤشر التنمية البشرية اللي كتنشرو كل عام الامم المتحدة. جينا فالرتبة 123 عالميا وشوهتنا كانت كبيرة باللي دول بحال فلسطين وليبيا والعراق فاتونا.
المبادرة الوطنية للتنمية البشرية للي كان طلقها الملك محمد السادس قبل سنوات ما بقاتش عاجبة حتى رئيس الدولة. قبل شي عام تقريبا انتقد ما سماه “الصعوبات، التي تواجه تطور النموذج التنموي، وعلى الاختلالات، سواء في ما يخص الإدارة، بكل مستوياتها، أو في ما يتعلق بالمجالس المنتخبة والجماعات الترابية”.
وقال في افتتاح السنة التشريعية العام اللي فات انه بدات “مرحلة حاسمة، تقوم على ربط المسؤولية بالمحاسبة، والعمل على إيجاد الأجوبة والحلول الملائمة، للإشكالات والقضايا الملحة للمواطنين”.
واضاف ان المغرب ما محتاجش دابا للتشخيص بل التنفيذ “أليس المطلوب هو التنفيذ الجيد للمشاريع التنموية المبرمجة، التي تم إطلاقها، ثم إيجاد حلول عملية وقابلة للتطبيق، للمشاكل الحقيقية، وللمطالب المعقولة، والتطلعات المشروعة للمواطنين، في التنمية والتعليم والصحة والشغل وغيرها؟”
دابا نشوفو اش من جديد من غير يطيرو الوالية كرماع اللي كانت مكلفة بالملف ولا مشاريع المبادرة الوطنية غاديين يبقاو يستافدو منها غير ديك العينة اللي كتكول العام زين.