السفير البلجيكي لبرلماني البيجيدي علي العسري مول زبلة التهجم على المتطوعات البلجيكيات: شكرا على التوضيح ديالك وحنا عمرنا خلطنا بين هدرتك والتدوينة ديال مجرم ماعندو لا اخلاق لا دين لاملة وهاد التوضيح مهم حيت غادي يكالمي الامور

السفير البلجيكي في المغرب تفاعل مع بلاغ المستشار البرلماني عن حزب العدالة والتنمية علي العسري، اللي وضح فيه ان تدوينتو المثيرة للجدل على السائحات البلجيكيات اللي كتب فيها: “متى كان الأوروبيون ينجزون الأوراش بلباس السباحة؟”، غير اولوها الناس، وهو كيمقت التطرف وجندي ضد الغلو والانغلاق وان مضمون تدوينتو بريء.
وعوض ما يقول للعسري ان هادشي جا معطل، وان التدوينة ديالو تسببات فالضرر واللي كان كان، اختار السفير مارك ترونتسو يشكر البرلماني على التوضيح ديالو، واكد ليه ان السفارة عمرها دارت خلط بين هدرتو والتدوينة ديال مجرم ماعندو لا اخلاق لا دين لا ملة، في اشارة لأستاذ للتعليم الابتدائي، اللي مشتبه في تورطه فقضية كتعلق بالإشادة والتحريض على ارتكاب أفعال إرهابية.
واضاف السفير البلجيكي ان هاد التوضيح مهم حيت ساعد باش الامور تكالما، ويتسالا هاد الصداع اللي ناض على الشبات البلجيكيات بلا ما يديرو حتى حاجة، بلعكس هما جاو بهدف نبيل، باش يعاونو ويتطوعو لبناء طريق بضواحي تارودانت.