” ايوا باش بغيتيه مسكين يترزق الله” هاد الجملة الشهيرة لي كايستعملها المغربي لامدا باش يفسر الظواهر السلبية فحال المافيا ديال الگارديانات د الطوموبيلات و الكرارس لي كاتحتل الاحياء و كاتسد الشوارع !

فينما كانت شي ظاهرة سلبية إلا و ضروري يخرج ليك شي بوخنونة راسو مربع باش يعطيها شي تفسير ! مثلا عباد الله فاش كاتنوض تشكى من الگارديانات ديال الطوموبيلات لي دايرين مافيا و كايرهبو فعباد الله و كايديو ليهم ديالهم بدون أدنى وجه حق كايخرج ليك شي ولد او بنت القحبة يقوليك ” ايوا راه تاهوما من حقهم يترزقو الله” ! فاش كاتشكى من مالين الكرارس ديال الحوت و الخضرة لي كايستاغلو الملك العام و كايسدو الشوارع و كايوسخو الاحياء ! او فاش كاتشكى من صحاب تشواط الريوس كايخرج نفس ولد القحبة بنفس الجملة الشهيرة ” ايوا مساكن باش بغيتيهم يترزقو الله ؟”
هاد التطبيع لي كاين مع ظواهر سلبية و هاد المفاهيم المغلوطة راه هوما لي خارجين على المغاربة و مخلينهم اللور لور ، و هاد التبزنيس و الانشطة الغير المهيكلة لي كاتنبت بخبار المخزن راه ماليها تا علاقة بالصورة ديال الدولة المتحضرة لي كاتعتابر شريك كبير للاتحاد الاوروبي و دولة باغا تكون كلمتها مسموعة فافريقيا.
راه حان الوقت باش الدولة تدخل و تشوف شي حل لهاد الانشطة الغير مهيكلة لي كاتخلي مواطنين يمارسو الحيف و الظلم على مواطنين اخرين تحت مسمى ” يسترزق الله” ! لي بغا يشفر و يوسخ و ينصب و يدي ديال عباد الله كايقوليك ” بغيت نترزق الله” ! گارديان ! شيفور طاكسي ! خضار ! مول ببوش … ايه كلشي من حقو يعيش و يترزق الله و لكن ماحناش عايشين فغابة راه دولة هادي عندها قوانين كاتنظمها و كاتنظم اقتصادها و كيما مواطن كايخلص الضرائب باش من حق واحد المواطن آخر مايخلصهاش ؟ واش نهبطو كاملين بالكرارس غدا !؟ و لا نلبسو كاملين جيليات غدا ؟
ماليها تا معنى جزء كبير من الاقتصاد المغربي هارب على الكونطرول ديال الدولة و ماكاتستافدش منو الخزينة و مكملها و مجملها بالاستيلاء على الشوارع و الاحياء والوسخ و الهاراج و المضاربات ! احياء كثيرة الناس لي فيها كايعانيو من مالين الكرارس ! شوارع مسدودة بمالين الكرارس ! الگارديانات دايرين مابغاو فعباد الله ….
سياسة عدي و قضي و ميك راه ماشي سياسة، خاص قرارات حقيقية و صرامة فالتعامل مع هاد الظواهر لما فيه خير للبلاد و العباد