سيتم حجب هذه الصورة تلقائيا عندما يتم الإبلاغ عنها من طرف عدة أشخاص.
واش حنا قرودة يجيو يتفرجو فينا السياح عريانين حفيانين مشعكين ؟! مناقص آ سيدي من هاد السياحة لي كاتبنى على الفقر و الميزيريا د ناس الجنوب الشرقي لي المستقبل قدامهم هوا شيفور ديال كاطكاط و لا سرباي فاوبيرج و لا گلاي فكازا
— دوزت هاد العطلة ديال راس العام فالجنوب الشرقي و بالضبط فمرزوگة و النواحي ( أرفود، الراشدية، الريصاني …) و اليوم فاش دخلت للخدمة لقيت راسي بلي تزگلت من عمل ارهابي كانت كاتخطط ليه شي جماعة بمناسبة رأس السنة الميلادية ( حسب خبر لجريدة h24info ) ! هاد الناس لي كانو كايخططو للعمل الارهابي كانو قالك باغين يضربو واحد الوحدة سياحية كايتجمعو فيها التوريست ! تخايل معايا نتا منطقة أصلا منكوبة فحال زاگورة و لا ارفود! محسوبة على المغرب غير النافع، مظاهر الفقر و الجوع فيها كاتبان ليك واضحة فحوايج الناس و فوجوهم و فولادهم لي كاتشوف فيهم نتائج سوء التغذية، و طرف د الخبز الوحيد لي يمكن ياكلو كايجيهم عن طريق دوك شوية ديال التوريست لي كايجيو يشوفو الصحرا و الشمش و يباتو فالخيام و يتقداو التمر و الأعشاب و هكاك يجي شي ولد القحبة مخوطر فراسو و يبغي يتفرگع تما و يجري على داك شوية ديال السياح و يجري معاهم على داك طرف د الخبز لي كاياكلو دوك الناس، ماشي الحماق هذا ؟ هادشي كايخليني نوصل للنقطة الثانية لي بغيت نطرحها فهاد المقال و لي الصراحة كاتاكلني بزاف، و مديرونجياني بزاف و كانلقا راسي فوقما سافرت لشي بلاصة فالمغرب بعرض السياحة كانطرح نفس السؤال على راسي : حتى لين غادي نبقاو عوالين على سياحة "الميزيرية" باش ناكلو طرف د الخبز؟ هاد سياحة "لاميزير " نوع سياحي جديد، ماركة مسجلة، خاص المغرب يسبق و يسجلها فسميتو قبل ماتسرقها ليه بوركينا فاصو و لا غامبيا و لا الطوگو ! حيت كيما كاينة السياحة الطبية فالتايلاند مثلا لي كاتخلي ناس الخليج يمشيو يتعالجو فيها و يديرو العمليات الدقيقة و التجميل و السياحة الثقافية فالمانيا و السياحة الدينية فالفاتيكان و لا السعودية … كاينة هاد السياحة الزلطاوية لي كاتبان ليا فين مامشيت فالمغرب ! سياحة مبنية على بيع مظاهر الفقر للتوريست لي شبعانين فكرشهم و فراسهم و كايقلبو يشوفو كي كايعيشو الشعوب المزلوطة لي كاتخرى فالعراء، كاتلقا جاك و لا بريجيت و لا خوان شبعو مع راسهم حضارة و نقى و ناطحات سحاب و فاش كايتوحشو يشوفو مظاهر الحياة البدائية و كيفاش كانو كايعيشو جدودهم فالكهوف عوض يساينو اختراع آلة الزمن للسفر عبر الزمن واحد ثلتالاف سنة لور ! كايقطعو غير بيي ديال الطيارة من مدريد للراشيدية و لا من باريس لفاس و كايجي يهزهم الشيفور بالكاط كاط من المطار باش يديهم للريصاني و لا لارفود و هاهوما مسافرين عبر الزمن فظرف ساعتاين ديال الطيارة، يشوفو مع راساتهم مظاهر الحياة البدائية الفقر و الجوع و انعدام أدنى شروط العيش الكريم عند بزاف ديال الناس، الشباب منشورين فالجرادي و الطروطوارات و الدراري الصغار كايتلاقاو للكيران ديال التوريست باش يسعاوهم، و الأمهات مغلفين وسط اثواب بالية… و مرحبا بكم في المغرب أجمل بلد في العالم ! باش آ خويا أجمل بلد في العالم ؟ بالشمش ! هاديك ديال الله بالجبال ! ديال الله بالصحرا ! ديال الله بالبحور! ديال الله هادشي كلو جينا و لقيناه واجد معطي لينا من عند الله ، ايو فيناهوا داكشي ديال الدولة و المجهودات و المخططات و المغرب الأزرق ؟ و التوريزم فيير ؟ و هاشتاغ "#come_visit_morocco ? واش غانبقاو حياتنا كاملة عوالين على المؤهلات الطبيعية، ماغانزيدوش من راسنا ؟ مافيديناش تال هاد الدرجة باش نطورو السياحة بمجهودات انسانية حقيقية يستافدو منها الناس ديال دوك المناطق بطريقة مباشرة ؟ واش ماكايناش الارادة السياسية و ماكاينينش افكار و لا ماكانينش فلوس و لا الفلوس لي كانين كادار ليهم قسم ردم ؟ فين كاين المشكل بالضبط ؟ وي التوريزم زوين و تاواحد ماكره تطور السياحة فهاد البلاد و تكون وسيلة لدفع العجلة الاقتصادية و الناس تبيع و تشري فالحوانت و البازارات و الصناعة التقليدية و الريسطورات و لوطيلات و شركات النقل تنتعش و لكن ماشي بهاد الطريقة اللاإنسانية عاوتاني راه بنادم هادوك ماشي قرودة يجيو يتفرجو فيهم التوريست عريانين و حفيانين مشعكين مغبرين، ماغانتاجروش ففقر الناس باش يبقا لينا السائح على خاطرو، السياحة لي ماغاديش تعود بالنفع بطريقة مباشرة على هاد المناطق ما سياحة ما والو، و السياحة الحقيقية راه بغات سبيطار مقاد و طريق مقادة و مدارس و ناس واكلة مزيان و شاربة الما الصالح للشرب. راه مناقص گاع من هاد السياحة لي مبنية على الميزيريا ديال الباشار و مناقص من هاد التوريست لي غايجيو يتفرجو فينا ترامينا عريانين و عظام وجهنا خارجين بالجوع راه خاص بنادم يعيش بكرامتو فبلادو آ صاحبي ! الناس ديال الجنوب الشرقي و فبزاف ديال المناطق فالمغرب كاتحس بيهم عايشين فزمن آخر غير الزمن لي عايش فيه العالم، ناس محرومة من ابسط شروط العيش، خاصهم السبيطارات و الاستثمارات فين يخدمو و يحركو الگرمومة و يقراو ولادهم و يوصلو و يوليو حاجات اخرى من غير سرباية فلوبيرجات و شيافر ديال الكاطكاطات د شركات النقل السياحي و سعاية كايلصقو فالكيران ديال التوريست و لا فأحسن الأحوال گلاية فحوانت الزريعة فكازا و الرباط و مراكش و المصيبة أغلب لي خدامين فمهن السياحة كاتلقاه مامديكلاريش خدام بلا روتريت بلا اصورانص بلا وراق تحت رحمة صحاب ليزاجونص مالين الشكارة لي دايرين كي المنشار طالعين واكلين هابطين واكلين مع التوريست و مع مالين لوطيلات و مع صحاب البازارات. و هنا فين كاتبان مسؤولية الدولة طبعا لي خاصها تبني الاستراتيجيات ديال السياحة على شي حاجات اخرى من غير " الحياة البدائية د السكان" و مسؤولية حتى ولاد دوك المناطق المنكوبة لي كاينجحوا فكازا و مكناس و الرباط و كايتنكرو لدوك المناطق ماكايفركوش يرجعو ليهم و لا يستثمرو فيهم و لا يعتقوهم بجغمة ديال الما
