المغربية كتعرض للاهانة من كاع الجهات. بالتزامن مع ما تعرضت له هاجر الريسوني من اهانة. الغبي عادل الميلوي اللي نكر ولادو ف”شدى تيفي”: ماشي راجل اللي ما ضربش مراتو

عادل الميلودي من بعد فضيحة التخلي على ولادو ولي بسبابها مابقاوش كيعيطو ليه لعدة مهرجانات, وبسباب الفضايح ديالو اليومية فاليوتوب واللايڤات ديالو فالفايس ولي ديما كيتهجم فيها على الناس وكيعطي الاراء المتخلفة ديالو فأي حاجة, هاد اليوماين طل علينا من “شدى تي في” باش يقول بللي الراجل لي مايضربش مرتو ماشي راجل.
تحريض واضح على العنف الاسري وعلى إحتقار المرأة, ودوزوه عادي فبرنامج “قطبي تو نايت” اللي داز نهار 25 غشت اللي فات واللي حطوه فصفحتهم على الفايس بلا حيا بلا حشما.
واخا حاول قطبي يصحح ليه هاد الشي والبلاطو ما تقبلش الهدرة ولكن الخطأ دار والقناة مسؤولة عليه. الطريقة باش كمل النقاش اللي كان فيه ضيف الممثل الفرنسي سامي نصري وبقاو كيتفلاو بهاد القضية الجدية بزاف. القناة مسؤولة عليه اكثر باش ختارت غير هاد اللقطة ودوزاتها فصفحة القناة على الفايسبوك.
باش تجيب عادل الميلودي للبلاطو باش يعتابر الراجل لي ميضربش مرتو ماشي راجل راه معندها حتى شي فرق مع تجيب ارهابيي شمهروش ويناديو بذبح السائحات ومعندها حتى شي فرق مع تجيب عنصري او متشدد هادو أراء ماخاصش تدوز فالراديو وفالاعلام خاص القطيعة مع التخلف ماشي الاستقبال ديالو وتعطاه فرصة فين يعبر .
هاد الشي تزامن مع ما تتعرض له الصحافية هاجر الريسوني اللي متابعينها بتهم قاصحة منها “الاجهاض”. المرأة المغربية كتعرض للاهانة من كاع الجيهات هاد ليام.
القناة عارفة باللي هان لمرا بزاف. هان مراتو اللي ما عتارفش ليها بولادو هان صحافيات وسبهم بوقاحة وحقارة هان نساء كثار.