دنيا باطمة دارت محامية باش تدعي لي كذبو عليها وطيحو عليها الباطل في قضية “حمزة مون بيبي”

المغنية دنيا باطمة وصلات البارح السبت للبحرين بعد أشهر طويلة في المغرب حيت كانو عندها الحفلات والمهرجانات. ومع حطاتها الطيارة علنات في بوسط في سناب أنها دارت محامية غادي ترفع دعوى قضائية على بعض المواقع لي نشرو عليها الكذوب.
وكتبات باطمة “تم توكيل محاميتي الاستاذة حنان وستباشر في القضية يوم الاثنين لكل من ساهم في نشر الأكاذيب من مواقع الكترونية تخطت حدود الصحافة إلى السخافة والتفاهة ولغرض تشويه السمعة.. لكم القانون وشكرا”.
وفي بوسط من وسط الطيارة كتبات دنيا “الاشاعة يؤلفها الحاقد وينشرها الأحمق ويصدقها الغبي.. فحاول ألا تكون من هؤلاء الثلاثة ولو مرة واحدة”.
ومن نهار تسد الكونط ديال “حمزة مون بيبي” خرجو بزاف ديال الاشاعات على باطمة، منهم انها دخلات الحبس وأنها هي مولات هاد الكونط لي اختصاصو يشوه ويبتز المشاهير ولكن هي خرجات في لايف وستوريات قالت انها ماعندها علاقة بيه ومامشدوداش في الحبس، واي واحد كتب ليها شي تعليق بهاد الخصوص كتجاوبو، وشي وحدين سباتهم كاع.