الانتخابات الرئاسية.. توانسة ل”كود”: باغيين التعليم والتنمية والصحة والاقتصاد ومعندنا ثقة فالمرشحين

التقت “كود” بعدد من المواطنين فتونس وسولاتهوم على الانتخابات الرئاسية المبكرة، التي أعلن عنها بعد وفاة الرئيس السابق الباجي القائد السبسي. “كود” بغات تعرف حتى رأي الشارع التونسي فالمرشحين للرئاسة، لكن كول واحد وآش كيقول وكلهم أجمعوا على التغيير.
عدد كبير من توانسة اللي هضرات معاهوم “كود” كيقول أن لبلاد خاص النهوض بها سواء تعليق الأمر بالصحة او التعليم او الاقتصاد لكن مكاينش معامن. سائق سيارة أجرة في حديثه مع “كود” قال على أن جل المرشحين مغادي يعطيو حتى شي قيمة مضافة، وبأنهم غير كيقلبو على الكرسي.
وأضاف أنه كاين واحد المرشح وحيد فيه شويا ديال الضو غادي يقدر يصوت عليه، متحدثا عن نبيل القروي المعتقل احتياطي على خلفية اتهامه بتبييض الاموال، الذي قال عنه بالحرف: “القروي يبقى رجل باهي معقول وداكشي علاش دخلوه للحبس ولفقو ليه تهم واهية، ومع ذلك عندو حظوظ، ومغاديش يخليوه يدوز”.
المتحدث وسلاتو “كود” على عدد من المرشحين بحال يوسف الشاهد. وأوضح هاد الشيفور ديال الطاكسي ل”كود”، أن الشاهد معندو تجربة فالعمل السياسي والخارجي ديال لبلاد، موضحا: “الشاهد مزال صغير ومعارف مزيان زمام الامور وتوانسة مايحبوه كاع، وهو بنفسو عارف هادشي”.
عامل نظافة هضرات معاه “كود” على رأيو فالمترشح الإسلامي عبد الفتاح مورو، أحد قادة الحركة الإسلامية في تونس، وقال على أنه كبر فالعمر وصعيب يتفاعل مع نبض الشارع. المتحدث نفسه أوضح أن تونس باغية رئيس يكون عارف مزيان الربيع العربي اللي بدا من سيدي بوزيد، ويكون باغي اصلاحات حقيقية، ماشي يقدم برامج باش ينجح وصافي.
إعلامية تونسية معروفة تخوفت من عزوف انتخابي كبير يكون ف البلاد، دون أن تخفي ل”كود” أن توانسة عاقو وفهمو بعد شرارة الربيع العربي، رغم أن معندوم ثقة فشي حد، غادي يعبرو عن رأيهم يوم الاقتراع =15 شتنبر الجاري=. وأضافت: توناسبة باغيين اصلاحات على ارض الواقع وبغاو العيش الكريم والتنمية والصحة والتعليم والامن واصلاح القضاء.