فضيحة وصافي. هادي كون دارتها دولة اخرى كون ناض الصداع. كيفاش الصين الديكتاتورية ضد حرية الصحافة باغية تتحكم فالاعلام فالمغرب. شراكات مع مؤسسات اعلامية عمومية واغرءات بالسفر وتكليف كمال لحلو باختيار مدراء الصحف

الجمعة اللي فاتت نظم كمال لحلو رئيس الفيدرالية المغربية للاعلام فكازا حفل لصحافيين مغاربة عارضة عليهم الصين. لحلو ولى سفير للصين بلا خبار حد. كيصايب ليهم الوفد الصحافي اللي خاصو يمشي للصين. دخل الفيدرالية المغربية لناشري الصحف فهاد البيعة والشرية. فهاد التخربيق. لحلو بلسانو قال ان هاد الزيارة كتدخل “فاطار التوجه السياسي للفيدرالية”. سفير هادا ماشي رئيس فيدرالية كدافع على مصالح باطرونات الاذاعات والصحف بالمغرب. شكون عطاه هاد المسؤولية؟ خاص نسولو بوريطة.
الرحلة للي فيها باطرونات الصحف غاديين على حساب الصين عشرة ايام. من 1 الى 10 دجنبر. كاليك “تبادل الخبرات والتجارب” مع الصين. واش هاديك الدولة يتبادل معاها شي حاجة. دولة لا تؤمن بحرية الصحافة. عندها غير القمع فلغتها. كيفاش غادية تعلمنا.
الصين باغية تحكم فالصحف فالمغرب. باغية تشد الباطرونات من بعد تخلق ليها ابواق فبلادنا. دارت قبل اتفاقية مع وكالة المغرب العربي للانباء، هادي ماشي مشكلة دارتها مع وكالة الانباء الصينية. دولة مع دولة مفهومة. ولكن دارت اتفاقية مع “شدى تيفي” و”شدى اف ام” ومع مؤسسات اعلامية خاصة.
الغريب فهاد الزيارة ان فيها باطرونات ومصطفي الخلفي الناطق الرسمي باسم الحكومة سابقا هو رئيس الوفد. كيفاش قبلو المدراء يكون وزير سابق رئيس وفد وعلاش اختارو كمال لحلو. كلشي تخربيق. مس بالدولة المغربية مس بحرية الصحافة. كيفاش يقبلو مدراء صحف يمشيو لدولة كيدخل الصحافيين للحبس. دولة لا عندهاش ايمان بحرية التعبير ولا الرأي ولا الصحافة.
اسئلة كثيرة على دولة كتشوف دول اخرى كتدخل فشؤونها الداخلية وساكتة. دابا كون كانت شي دولة بحال فرنسا او امريكا دارت نفس الرحلة بنفس الطريقة وبنفس رئيس الوفد كون دارت فضيحة. دارتها دولة ديكتاتورية كلشي ضارب الطم. الخطر لكبير هو تفيق تلقى الصين محكمة فكاع وسائل الاعلام ديال بلادك. عندهم محامي اسمه كمال لحلو اللي ولى كيسير ويتحكم فكلشي