روينة ف عاصمة سوس البارح، تزامنا مع زيارة محمد السادس اللي كان كلشي يكتسناها لأكادير. هاد الروينة سبابها انتشار فايك نيوز فيه ان الداخلية عفات والي جهة سوس ماسة، احمد حجي، وتغييره بمحمد اليعقوبي والي جهة الرباطسلاالقنيطرة. وفي هذا السياق، أكد مصدر رسمي ل”كود” أن “والي جهة سوس باقي فبلاصتو وهاد الشي غير الاشاعات”، مصدر اخر اوضح ل”كود” أن “مصالح الولاية خدامة ليل ونهار كتستعد للتدشينات الملكية لعدد من المشاريع المهمة اللي ممكن تدار وممكن تتأجل. هاد الفايك نيوز، روجوه بزاف ما بات يعرف إعلاميا ب”كتائب البي جي دي”، تزامنا مع الصراع لي كاين بين المنتخبين ديال المصباح مع مصالح وزارة الداخلية، خصوصا بعد إقدام الأخيرة على هدم مشاريع. المعطيات القادمة من مراكز القرار بسوس، تفيد بأن “الارتجالية وسوء التدبير” داخل المجالس المنتخبة بالجهة وليس فقط مدينة أكادير، أقلق المسؤولين، وهو ما ساهم في عرقلة هذه المشاريع. طبعا مجلس جماعة أكادير، عاش صراعات داخلية متفكوش واخا تدخل عزيز رباح رئيس جمعية منتخبي البي جي دي، هاد الصراعات استقل فيها مهندس معروف من الأغلبية واتهم المجلس بارتكاب خروقات في عدد من المشاريع، هادشي خلال المجلس يعيش ف دوامة وينسا المشاريع لي عندها علاقة مباشرة بالسير ديال المدينة. مصادر من المعارضة قالت ل”كود” بلي :”هاد المجلس الجماعي مافيدوش وبغا يدير مشاريع كولها ف السنة الانتخابية أي 2020 وهي سنة ماشي عادية ومخاصش يكون فيها هاد التسريع باش تربح الاصوات هادشي مامقبولش وفين كانو هاد 4 سنين”. روينة واقعا ف اكادير، شي كايتهم شي، مكاين تعاون بين المنتخبين والسلطات المحلية، على عكس باقي المدن بحال طنجة ومراكش. هاد سوس جا منها رئيس حكومة وبالضبط ف انزكان، ومقادش يفك هاد المشاكل، هادشي كيبين بلي “بنعرفة مافيدوش” وفق تعبير برلماني تحدث إلى “كود”. دابا ولاية أكادير ولات عندها شركة كتقوم بامور تدبيرية على غرار كازا والرباط. يمكن الأمور تتحرك والمدينة تخرج من فوضاها ومشاكلها
