بعد شوهة التجمهر لتغطية شفاء المصابين بكورونا قدام كلينيك فكازا.. نقابة الصحافة للصحافيين: هذو أحداث عادية مكايشكلوش سبق صحافي وماتغامروش بحياتكم على بطولات بلا نفع

النقابة الوطنية للصحافة المغربية عبرات على الانزعاج ديالها بسبب طريقة تغطية بعض الصحافيين لأحداث شفاء مصابين بفيروس كورونا المستجد فمجموعة من المصحات الخاصة والسبيطارات العمومية، والفوضى والتجمهر اللي ميوقع بسباب هذشي، واللي كيمكن يسهل انتشار الفيروس وانتقال العدوى وسطهم.
وقالت النقابة، فنداء ليها للصحافيين توصلات بيه "كود"، بللي السبيطارات والكلينيكات هي مسارح ديال الفيروس أولا، ثم الزحام والتدافع يقدر يخلق مشكل، وفيه مخاطرة لحد أقصى لأجل بطولات لا نفع فيها، فالوقت اللي كيمكن فيه تبادل الصور ديال هذ الأحداث، باش مايكونوش تجمعات.
وواخا الجسم الصحافي مازال لحد الساعة ماتقاسش بالفيروس، ومجموعة من المؤسسات الإعلامية قايمة بواجب التعقيم، "فإننا بدأنا نشعر بكثير من القلق من ممارسات وتصرفات مزعجة قد تجعلنا نندم كثيرا"، على حساب اللي جا فالنداء.
وأكدات النقابة على المؤسسات الإعلامية باش تدير كل ما فجهدها باش تحمي الصحافيين ديالها، وتوجه الصحافيين، وخصوصا منهم المصورين، باش ياخذو الحذر ديالهم، والتنسيق معاهم حول الأماكن اللي كيكون فيها التصوير ضروري، مع توفير جميع شروط السلامة الصحية للصحفيين، ومواكبة تحركاتهم فميادين التغطيات.
وناشدات النقابة الجهات الرسمية المكلفة بتنظيم التواصل بمختلف المصالح ذات الصلة بمكافحة الفيروس، باش تتخذ الإجراءات اللازمة باش ماتتكررش مشاهد الازدحام الخطر، بإلغاء ما ليس ضروريا للإخبار، والاكتفاء بتوفير المعلومة اللي كتخدم أجواء مكافحة هذه الجائحة حصريا وبلا استعراض.
وناشدات النقابة كذلك، فختام نداءها، السلطات المعنية باش تنظم عمل الصحافيين، وتحرص على منع المتطفلين من إغراق المنصات والساحات اللي كتكون فيها التغطية مكثفة.
وللإشارة، كان مستشار وزير الصحة المكلف بالتواصل طلب من الصحافيين باش يغطيو حدث شفاء حالات من فيروس كورونا فمصحة فكازا، لبارح الخميس، وهذشي خلا الصحافيين يجيو ويتزاحمو قدام باب الكلينيك، ويكونو بالتالي تجمع بشري خطير ممكن يتسبب فانتقال عدوى الفيروس.