بالفيديو. مونتانيي مول نوبل للطب اللي فقد مصداقيتو شحال هادي منوض روينة بتصريحاتو الاخيرة: كورونا خرجات من مختبر صيني وتصايبات من فيروس السيدا

البروفيسور الفرنسي لوك مونتانيي اللّي حاصل على جائزة نوبل للطب فسنة 2008، واللي من شحال هادي بدا كيخرج على العلم، وكيصرح بحاجات ماعندها لا ساس لا راس، بحال ان السيدا كتجي للافريقيين بزاف حيت التغدية ديالهم ناقصة، والحملة اللي كان دار ضد التلقيح في فرنسا، أثارضجة كبيرة.
مونتانيي قال على أنه كاين فرضية أن فيروس كورونا اخرج في الواقع بالخطأ من مختبر صيني واضاف انو هاد الفيروس تصايب من فيروس السيدا.
وزاد البروفيسور الفرنساوي مونتانيي أن الفيروس الجديد انتشر بسبب انعدام الاحتياطات الصحية اللازمة، مشيرا إلى أن المختبر ديال مدينة ووهان الصينية، اللّي اخرج منو فيروس كورونا، تخصص فهاد الفيروسات التاجية منذ أوائل العقد الأول من القرن الحادي والعشرين، وعندهوم خبرة فهاد المجال.
طبعا البروفيسور ماعندو حتى حجة على هادشي اللي صرح بيه، وكيف ذكرات صحيفة "لوموند" الفرنسية في مقالها عليه ليوم، فهاد العالم غير كيخربق والعلماء ماقنعهومش هادشي اللي قال حيت فالحقيقة التشابه بين السيكونس ديال فيروس كورونا المستجد وفيروس السيدا غير كافي باش نقرو انه مصايب منو.
واضافت "لوموند" فمقالها، ان فكرة كون فيروس كورونا من صنع انسان مشكوك فامرها وبزاف، حيت تركيبة الفيروس كتبين على انه طبيعي 100%، وان اصلو حيواني.
واضافت الصحيفة ان هادي ماشي اول مرة كيشوه هاد البروفيسور سمعتو، واخا عظمة خدمتو فالدومين، فمثلا هادي سنوات قال انه من الناس اللي كثيق ان الما عندو ذكرة، وكيظن ان فاكهة الباباي كداوي باركينسون، وكان قال ان التوحد سبابو ميكروب...
المهم، السيد خرف، وتصريحاتو عطات المجال للناس اللي عزيز عليها المؤامرة تكتب وتبارطاجي.