من بعد ما تجاوزنا 3000 إصابة بقات غير مديريات جهات كازا وطنجة اللي ما علنوش على التفاصيل.. وها أعداد الإصابات بفيروس كورونا فمختلف جهات وأقاليم المغرب

جميع المديريات الجهوية علنات، مساء اليوم الإثنين فالصفحات ديالهم الرسمية ف"فيسبوك"، على مجموع الإصابات بفيروس كورونا المستجد فالأقاليم ديالها فهذ 24 ساعة اللي فاتت، باستثناء جهات كازا وطنجة اللي لحد الساعة مزال ما علنوش، بسبب تسجيل بؤر فبعض أقاليمها، وكيتعلق الأمر ببؤرة صناعية جديدة فكازا، وجوج بؤر فطنجة، وبؤرة فالعرايش.
وعلنات الوزارة على ارتفاع عدد الإصابات فجهة كازا سطات ل840 إصابة، وارتفاع عدد الإصابات فجهة طنجة تطوان الحسيمة ل383، أي بزايدة 58 و71 إصابة لكل منهما، لكن التفاصيل ديال الإصابة بالأقاليم مازال ما تم الإعلان عليها.
وجهات الأقاليم الجنوبية هي الوحيدة اللي ما عرفات حتى شي جديد، بالإضافة لجهة درعة تافيلالت اللي سجلات 4 حالات شفاء جديدة بلا حتى شي ارتفاع لا فالإصابات ولا فالوفيات.
بالنسبة للتفاصيل الأخرى، كتجي جهة جهة مراكش آسفي فالمركز الثاني بعد جهة كازا سطات ب739 حالة مؤكدة، منها 36 وفات و61 حالة تعافي، وتوزعات على النحو التالي: مراكش 470، الرحامنة 215، الحوز 26، شيشاوة 23، قلعة السراغنة 3، الصويرة 2، واليوسفية وآسفي 0 حالة.
فالمركز الثالث كتجي جهة فاس مكناس اللي سجلات 463 حالة، 24 ماتو، و66 تشافاو. وبخصوص الحالات المسجلة فالأقاليم فتسجلات 282 ففاس، 99 فمكناس، 42 فتازة، 18 فإفران، 11 فصفرو، 7 فتاونات، 3 حالات فمولاي عقوب، حالة فالحاجب، و0 حالة فبولمان.
فالمركز الخامس، بعد جهة طنجة تطوان الحسيمة، كتجي جهة الرباط سلا القنيطرة، اللي سجلات 280 إصابة، 10 وفيات و105 حالة شفاء، وبالنسبة للإصابات فالأقاليم فالرباط بلغات 119 إصابة، الصخيرات تمارة 81، سلا 50، القنيطرة 22، الخميسات 7، سيدي سليمان حالة واحدة، وسيدي قاسم صفر حالة.
فالمركز السادس كاتجي الجهة الشرقية ب155 حالة مؤكدة، الوفيات 8، واللي تشافاو 16. بالنسبة للتوزيع: وجدة أنكَاد 54، الناظور 39، بركان 37، تاوريرت 9، كَرسيف 8، الدريوش7، وجرادة صفر حالة.
المركز السابع جات فيه جهة درعة تافيلالت، بمجموع 86 حالة مؤكدة بحال لبارح، وتسجلات 2 وفيات و19 حالة شفاء فالمجموع. وكتذكير للعدد الحالات فالأقاليم مسجلة 45 فميدلت، 30 فورززات، 5 فالرشيدية، 5 فزاكَورة، وحالة وحدة فتنغير.
المركز 8 من نصيب جهة بني ملال خنيفرة سجلات 61 حالة مؤكدة، 6 وفيات و12 حالات شفاء. وبالنسبة للحالات فعدد الأقاليم فتسجلات 25 فخريبكَة، 21 فآزيلال، 10 فالفقي بنصالح، 4 فبني ملال، وحالة وحدة فخنيفرة.
المركز التاسع جات فيه جهة سوس ماسة، سجلات 47 حالة، منها 5 وفيات و13 واحد تشافا، توزعات على أكادير إداوتانان ب22 حالة، إنزكَان آيت ملول ب18 حالة، طاطا ب4 حالات، اشتوكة آيت باها ب2 حالات، تارودانت بحالة وحدة، وتيزنيت ب0 حالة.
فالمركز العاشر كتجي فيه الأقاليم الجنوبية اللي ما سجلات اليوم حتى شي جديد كيف قلنا، جهة العيون الساقية الحمرا مسجلة أربع إصابات فإقليم بوجدور وكلها تعافات، ثم جهة الداخلة واد الذهب اللي مسجلة 2 إصابات فإقليم واد الذهب، تعافات منها حالة وحدة، وجهة كَلميم واد نون، اللي مسجلة حالة وحدة مؤكدة فكَلميم، وهذ الحالة تم الشفاء ديالها.
و"كود" غتتكلف بتزويدكم على آخر المعطيات بخصوص أعداد الإصابات فالأقاليم فكل من جهة كازا سطات وجهة طنجة تطوان الحسيمة مباشرة فاش يعلنو عليهم.
وبالنسبة للمجموع، محمد اليوبي، مدير مديرية الأوبئة والوقاية من الامراض، علن فالندوة داليوم مع الستة دالعشية على تسجيل 3046 حالة دالإصابة بكورونا فالطوطال، منها 143 وفاة، و350 واحد تشافا.