هادشي لي قال الدكتور الفايد ماشي جديد ولكن لي جديد هو مجموعة ديال الناس القاريين المثقفين لي كانو كيعتابرو الدولة سلطوية وكتضيق على الحريات ولاو هوما غادين قدامها وكينعتو ليها على أي واحد مكيتافقوش معاه

الدكتور الفايد سنوات وهو كيهرطق على العباد وكيدير الحلقة بنفس الطريقة ديال أي حلايقي كيبيع لعشوب فالسوق، وبحالو كثار فالسواق والأحياء وحالين حوانت كيبيعو فيهم لعشوب ويديرو الحجامة وحتى الرقية ( الرقية فيها وفيها)، وحتى هوما قاريين كتوبة ديال التداوي بالاعشاب والطب النووي، وحتى هوما كيخلطو مصطلحات علمية مع الدارجة ديال السواق مع قال الله قال الرسول ويكمسو ويعطيو للبنادم، الدكتور الفايد زايد عليهم بالقراية والحلقة فاليوتوب والمجالس والقنوات، وبحال الدكتور الفايد كاينين فالعالم وفكاع الثقافات، غادي تلقاهم فالجابون وكوريا وهونك كونك وسنغافورة لي عندهم أعلى معدل ذكاء وغادي تلقاهم فالدول ديال الخبز ولما معاك يكفيني، وطبعا غادي تلقاهم فميريكان بشكل مضخم وهوليودي كي عادة ميريكان ودايرين الاطنان ديال الفلوس وعندهم الغلمان والحريم.
هادشي لي قال الدكتور الفايد ماشي جديد ولكن لي جديد هو مجموعة ديال الناس القاريين المثقفين لي كانو كيعتابرو الدولة سلطوية وكتضيق على الحريات ولاو هوما غادين قدامها وكينعتو ليها على أي واحد مكيتافقوش معاه، خصوصا أن القضية بدات بإعتقال بحال مي نعيمة وبعض مشاهير اليوتوب وإنستغرام ، وأي واحد أو وحدة شككو في كورونا ونشرو محتوى غير علمي يقدر يخلي المغاربة مايلتازموش بالحجر الصحي، أو محتوى فيه خرق للقانون كيتشد، هاد طريقة التعامل من طرف الدولة لقات صدى وترحيب عند صحاب حرية الرأي والتعبير والنضال والثقافة والفنون، وكان قلبهم طايب على التفاهة لي كيتشكاو منها سنوات هادي ماشي حيت تفاهة ولكن حيت تفاهة كتدخل الزبابل ديال الفلوس على ماليها، وخلات وحدة بحال مي نعيمة مرأة بدوية ماقارياش غير بعفويتها وتشارك حياتها مع الناس قدرات تشري دار فعام ديال اليوتوب، الحاجة لي مايمكنش تديرها حتى فعشرسنين بصالير ديال معلم.
لدرجة وللى الأمر بحال شي محاكم ديال التفتيش ماشي مقارعة الحجة بالحجة أو الإعتراف بي الهرطقة والدجل كجزء من هويتنا كمغاربة أولا وكبشر تانيا، حيت راه مكايناش شي دولة في العالم شعبها كيآمن بالعلم مية في المية ومعندوش مع الشعودة والدجل والتهرطيق، كل بلاد ومهرطقيها، وكل بلاد وفيها الالاف من الدكتور الفايد وزايدين عليه بالتهرطيق وعندهم سلطة ومريدين ودايرين طوائف غير بهادشي ديال آجيو نوليو نباتيين آجيو ناكلو صحي آجيو نتبعو طريقة تغذية جدودنا، في حالتنا حنا المغاربة جدودنا راه كانو عايشين غير بيرني وفتات الشطبة وماكلتهم كي الكلاب وحياتهم كانت قصيرة وشابعين أمراض بحالهم بحال أغلب سكان الأرض مع درجات تفاوت حسب الحضارة لي مكانتش واصلانا حنا.