سيتم حجب هذه الصورة تلقائيا عندما يتم الإبلاغ عنها من طرف عدة أشخاص.
لي عندو شي ولاد يربيهم ! و يقريهم ! و يعلمهم دوك القيم لي باغيهم يتعلموها و بلا مايجيب سبتو على سوحليفة ! فين ماكاين شي فاشل و لا شي فاشلة خرجو كايبكيو " واك واك سوحليفة تهدد قيم التربية و الاسرة المغربية " آ سير تنبگ!
سوحلفية فنيا عيان بزاف و فاش كانشوف شي حلقات فيه كانلقا راسي كانتسائل على واش هاد الناس مخلصين فلوس صحيحة و خدامين و مضيعين الوقت باش يخرجو لينا هاد الرداءة هادي ! ولكن بعض النظر على القيمة الفنية الرديئة ديالو لي لاحظت مؤخرا هوا واحد الهجوم شرس على هاد العمل من طرف بعض مدعي الفضيلة ! بنادم من نيتو كايسب فسوحليفة و البنت لي لاعبة الدور و فجأة ولا سوحليفة مسلسل يستهدف قيم الاسرة المغربية و يضرب عرض الحائط باسس التربية و يساهم في نشر الفساد و غايضسر الدراري على واليديهم و غايهدم العلاقات الاسرية وا وا وا وا وا وا ….و الناس كايدعيو لمقاطعة المسلسل و منوضين الحيحة ! و حيت هادشي ماشي تالهيه داكشي علاش غانسطل بسطلي فهاد الموضوع! اولا خلينا نتافقوا انه فالعالم كامل كاينة اعمال فنية لي الابطال ديالها اطفال انا بعدا فحياتي تفرجت فعرام د المسلسلات و الافلام الميريكانية و المصرية لي الابطال ديالها ولاد صغار ! سلسلة مالكوم ! لافامي كولين ! Une nounou d'enfer لي كان كايدوز فدوزام قبل مايدخلو هاد الهايشمايش التلفزة ! و فاش كايكونو الابطال اطفال راه طبعا الهدف ماشي هوا يجيبو ليك شي طفل مطنگ منونخ واكل دهگة د العصا و يوريوه ليك ! طبعا خاصو يكون طفل خارج عن المألوف ! طفل غير عادي ! طفل كايهضر بشكل مختلف و كايعيش بشكل مختلف ! و على داك الاختلاف كايدور الفيلم و لا المسلسل ! هاديك هي القصة يا …. !ماستوعبتيهاش ؟ و فالعالم كامل كايتفرجو فيهم الناس و كايضحكو على المواقف الكوميدية و دوك الاطفال كايوليو نجوم و المسلسلات ديالهم كاتحقق نجاحات باهرة ! و ماعمرك غاتشوف شي بكاي و لا شي موخنونة كايتشكاو آه حقا لاواه هادشي ماخاصش يشوفوه الدراري الصغار ! هادشي غادي يأثر على التربية و القيم د الدراري الصغار! آ سيري تنبگي و لا عندك شي عقل و شي بيداغوجية و شي فهامة ربي ولادك راسك ! نتا كأب و لا كأم راه خاصك تحمل مسؤوليتك آ سيموحمد فالتربية ديال داك البجغوط لي قررتي تجيبو للوجود ! ماشي تسنا سوحليفة و لا توخريفة تربيه ليك ! مزيناتك ! باغي نتا تولد الولاد و تطوي رجل على رجل و تربع يديك و تطلقهم تربيهم ليك المدرسة و يربيوهم ليك المغنيين و يربيوهم ليك الممثلين ! و نتا آ العزيز شنو الدور ديالك فهاد البيعاوشريا ؟! الاعمال الفنية ماشي مشروط عليها تعجبك "اخلاقيا" و تكون فيها نفس "القيم" لي نتا باغيها تكون فحياتك ! الاعمال الفنية الهدف ديالها الاساسي هوا تفوج عليا ! هوا تخليني نهرب من الواقع و نتفاجا و نتفرج و نضحك و نكركر و نبكي و نعيش فعالم آخر لمدة من الزمن ! هادشي لاش كايصلاح الراب و المسرح و التمثيل و هادشي لاش دارو الاغاني و المسرحيات و الافلام و السيتكومات و لا فوجو عليك راه هاداك هوا الربح و راس المال !
