كيفاش الدولة يالاه بانت ليها لاسامير ملي طاح سعر البترول: من التهميش إلى كراء الخزانات

الدولة لي همشات لاسامير ملي دارت فاييط ف 2015 يالاه عرفات بقيمة هاد المصفاة ملي بدات ازمة التخزين العالمية وطاح ثمن البترول.
حسب تقرير لرويترز الدولة بغات تكري منصات التخزين ديال لاسامير لي قدرة ديالها 2 مليون متر مكعب ولي بامكانها تغطي الحد الادنى من حاجيات البلاد من النفط لي هو 60 يوم ولي مازال مقدراتش الشركات الخاصة تغطيه.
وفين كانت الدولة ملي نقابة ديال لاسامير وهيئات وطنية طالبات بتأميم او تسهيل بيع لاسامير بعدما تخوصصات ولاحها العمودي بشكل افقي للهاوية بسبب لكريديات والضرائب لي كاتسالو الدولة وسوء التسيير.
دابا هاد الخطوة ديال اكريو قدرات لاسامير التخزينية كاتبين ان الدولة كانت غالطة بتهميشها لهذه المصفاة. كان يمكن للمغرب اشري النفط الخام واكرروا (التكرير) محليا عوض اشري المنتوج الصافي بثمن غالي.
ناس ديال النقابة فلاسامير دارو بيان وماعاجبهومش هاد التعامل الانتقائي بغاو عملية التكرير ترجع والدولة تتدخل دير التأميم ولاتسهل عملية البيع.
واحد التقرير دارتو رويترز عام 2018 كايقول ان هاد معامل تكرير النفط ايلا بقات مسدودة بزاف كاتصدا وكايصعاب اعادة التشغيل ديالها ولهذا حتا الناس لي خدامين فلاسامير كايطالبو بحل استعجالي.
لاسامير كانت كاتغطي 60 بالمائة من حاجيات النفط الوطني وكانت مخدمة الناس ومدورة الحركة فالمحمدية.
يشار الى أن المصفاة تبنات في الخمسينات في شراكة مع شركة ايطاليا باش المغرب اضمن الامن الطاقي ديالو.
وزير الطاقة عزيز رباح، عمر كانو عندو جواب، الملف مكانش من الاولويات ديالو، وهادشي حسب نقابيين، كيبين أن سنوات الضياع الطاقي لي عاش المغرب، كانت بسبب غياب ارادة لدى مسؤولين بحال رباح.