كتب لصاحبتو أرض على قدها فمراكش.. ها كيفاش كان خوان كارلوس كيبيض ويليكيدي عليه فائض الثروة

خوان كارلوس، الملك السابق ديال اسبانيا، عركَها فلوس مزيان قبل ما يتنحا على العرش لولدو فليبي السادس، عدد "لوموند" ديال لبارح الخميس 28 ماي كشف على بزاف ديال التفاصيل دالثروة ديالو اللي ماخضعش عليها لحتى شي محاسبة.
وحسب "لوموند"، باش يحيد عليه التخمة، ويليكيدي عليه فائض الثروة، كارلوس كتب لصاحبتو القديمة، الفيلسوفة الألمانية كورينا زو ساين فيتكَينشتاين، فعام 2012، أرض قدها قداش فمدينة مراكش فالمغرب، وهذشي بلا خبارها كَاع.
صاحبتو، اللي كانت أكدات، فتصريحات سابقة، بللي كانت كاتاخد كادوات باهضة الثمن، اعتبراتها "مسمومة"، حيت كانت وسيلة باش يبيض أموالو وينقص عليه الشبهات، "وبالنسبة للأرض فمراكش، فخداها لي ماشي حيت كيبغيني بزاف، لكن باش يبعدني شوية على موناكو فين كنسكن"، كيف قالت.
وكشفات بللي الملك السبليوني السابق "كيدير اللي بغا وما كيفرقش بين القانوني وغير القانوني" وقالت بللي كان عندو كونط فسويسرا بسمية الكوزان ديالو، كان كيستعملو باش يخلص رحلات جوية خاصة للقاعدة العسكرية "تيريخون دي أندوز".
وكانت فديك الفترة كورينا كتتلقى تهديدات وضغوط من مدير المصالح السرية الإسبانية، فليكس سانز رولاند، باش تحافظ على الأسرار ديال الممتلكات ديالها من خوان كالوس، هذشي قبل ما يخرج هو من بعد سنوات يفضحو، ويقول بللي كارلوس كان مشا لجنيف بمليون و900 ألف ديال الدولار إيسبيس.
وكان كارلوس استفد من العفو الضريبي عام 2012، وحصل على هدايا فخمة من ملوك الخليج، من بينهم الملك السابق السعودي فهد بن عبد العزيز آل سعود اللي عطاه هبة ديال 100 مليون دولار ف2005، وف1989 خدا كارلوس يخت من الحسين بن طلال، الملك السابق دالأردن، والإمارات هداتو جوج طوموبيلات من نوع "فيراري" ف2011.
ولحد الساعة، كتقول "لوموند" بللي الملك السابق ديال اسبانيا ماخضع لحتى شي محاسبة على الثروة ديالو، ومادار حتى شي تصريح بالممتلكات، وكتقول بللي هذ الثروة الكبيرة ديالو ممكن تهدد المستقبل المالي ديال اسبانيا.