السبيطارات الجامعية غيتكلفو بالتحاليل بالإضافة للمختبرات.. المغرب غيولي يدير 10 آلاف تحليلة فالنهار للكشف على المصابين ب"كورونا"

المغرب عزز الاستراتيجية ديالو فيما يتعلق بالتحليلات اللي كتجرى للناس اللي مصابين بفيروس "كورونا" المستجد، من دابا لفوق غايولي يدير 10 آلاف تحليلة فالنهار، فوقت اللي كايدير دابا المتوسط ديال 60 تحليلة فالنهار.
وحسب جورنال "ليكونوميست"، المغرب اليوم خدا قرار باش التحاليل ميبقاوش منحاصرين فقط على المختبرات الثلاثة اللي كيجريوهم دابا، واللي هوما مختبر باستور فكازا، ومختبر المعهد الوطني للصحة، ومختبر المستشفى العسكري، ودابا غايوليو يدارو فكَاع المستشفيات الجامعية.
المغرب فهذ المرحلة معتمد فقط على المختبرات ديال الدولة، أما المختبرات الخاصة فماعندهمش الحق يجريو تحاليل بحال هذي نظرا لخطورتها.
ورفع أعداد التحاليل اللي كتجرى فاليوم الواحد وسيلة باش يتم الكشف على المصابين بشكل أكثر دقة، بحال كيفما دارت دول أخرى، وخصوصا منها الأوروبية، وخصوصا ألمانيا اللي كتدير 500 ألف تحليلة فالسيمانة، وفرانسا اللي عوالة تدير 80 ألف تحليلة فاليوم.
وللإشارة، ذكرات تقارير كورية بللي المغرب استورد 100 ألف جهاز ديال الكشف السريع على "كورونا" من كوريا، واللي كتبان النتائج ديالو من بعد ساعتين فقط.
ولحد الساعة، الوزارة ماعطات حتى شي تفاصيل بخصوص الأعداد ديال التحاليل اللي كتدار، وشكون هوما الناس بالضبط اللي عندهم الحق يديرو التحاليل، فالوقت اللي المرض دابا تسرب للكثير من الحالات المحلية، ومجموعة منهم مكاتبانش فيها أعراض الإصابة بالفيروس حتى كتكون عادات بزاف وفات الفوت.