واش كان خاص سفيرة فرانسا تبدل تدوينتها؟ بنموسى ل"كود" : الالفاظ اللي استعملات ماشي ملائمة للواقع وباش نوجدو نموذجنا المغربي بالسيادة المغربية خاصنا نفهمو ما يجري فالعالم

"كود" سولات شكيب بنموسى رئيس اللجنة المكلفة بالنموذج التنموي الجديد واش كان على ايلين دو گال سفيرة فرانسا فالرباط تمسح تدوينتها اللي دارتها بعد ما دار معها لقاء بالفيزيو كونفيروس الجمعة اللي فات. هاد التدوينة فيها باللي بنموسى قدم ليها "تقرير مرحلي" على عمل اللجنة.
بنموسى قال ل"كود" "هادا يعني باللي ما يمكنش ندخل فنيتها". ثم اضاف ل"كود" "ما عنديش معاها اتصال. التدوينة خدات طابع اخر. استعملات الفاظ ما كانت ملائمة. ما عندهاش علاقة بالواقع".
رئيس اللجنة اللي هو سفير للمغرب بباريس اضاف فتصريحو ل"كود":"هادا لقاء عادي من لقاءات دارتها اللجنة مع سفراء دول ومنظمات وغادي نديرو لقاءات اخرى
بنموسى ما عندوش شي اتصال بهاد السفيرة اللي دارت هاد التدوينة وتسببات فهاد الجدل لكبير.
رئيس اللجنة اكد ل"كود" باللي هاد اللجنة مغربية وكتقلب على "نموذج مغربي" للتنمية في اطار "السيادة المغربية" وباللي خاص "نفهمو المحيط" باش يقدر يساعد بلادنا٬ خاصة مع هاد الشي ديال كورونا وللي خلقات ظروف عالمية جديدة