واش غادي ترجع الرّعدة لجهة فاس مكناس؟. الأرصاد الجوية ل"كود": كاين عدم استقرار فهاد المناطق ودبا ننتقل من الربيع للصيف

هادي يومين شهدت عدد من المناطق بجهة فاس مكناس رعدة خايبة، كانت سبب في تسجيل خسائر وأضرار جسيمة جاءت على محصولات زراعية. لكن واش هاد الرعدة غادي ترجع بنفس الطريقة أو لا.
"كود" سولات مديرية الأرصاد الجوية اللّي أكدات أنها مغاديش ترجع بداك الشكل حسب التوقعات المتوفرة لها. الحسين بوعابد المسؤول على التواصل في المديرية أكد أنه غادي يكون عدم الاستقرار في مناطق الأطلس المتوسط والكبير ومناطق سايس لكن عادي ماشي بحال الرعدة لي كانت.
وأبرز المتحدث، في تصريح ل"كود"، قائلاً: "مخاصناش ننساو أن هاد الفترة هي الانتقال من فصل الربيع نحو فصل الصيف، وتتميز هاد الفترة بالذات بظهور سحوب غير مستقرة في المناطق الجبلية".
وأضاف بوعباد: "ديما فهاد الفترة كيكون داك الجو، سيما يلا كان شي عوامل معاه، واللّي خاص كولشي يعرف هو أن شهري أبريل وماي ديما كيكون فيهوم الجو بحال هكا".