الحصيلة الأسبوعية لكورونا.. 45 فالمية من مجموع الحالات تسجلات فالنصف الأول من شهر غشت.. 305 واحد مات بالفيروس ف15 ليوم فقط

فهذ الأسبوع اللخر، فحدود يوم الأحد 16 غشت 2020، المغرب سجل 9252 إصابة بفيروس كورونا المستجد، بمعدل إصابة تراكمي ديال 25,45 لكل 100 ألف نسمة.
وكشف معاذ المرابط، منسق المركز الوطني للطوارى الصحية العامة، أن مجموع الإصابات هذ السيمانة كيشكل 21,8 فالمية من الطوطال دالإصابات اللي تسجلو من نهار بدا الوباء فالمغرب، والإصابات اللي تسجلو فهذ النصف الأول ديال الشهر كيشكلو 43 فالمية من الطوطال كامل، وكيشكلو هذ الشهر 50 لكل 100 ألف نسمة.
وحتى الوفيات اللي تسجلو هذ الاسبوع كانو كثار بزاف، بحيث المغرب سجل 160 وفاة فظرف 7 أيام (24,3 فالمية من مجموع الوفيات)، وهذشي من أصل 305 دالوفيات اللي تسجلات فهذ النصف الأول من شهر غشت، وهو رقم قياسي شهري جديد للمغرب من ناحية الموت بكورونا، بحيث شهر أبريل اللي عرف أعلى معدل تسجلو فيه كامل غير 134 وفاة.
وهذ السيمانة، انتقل معدل الإصابة الأسبوعي من 21 لكل 24، و37 إقليم تقاسو فيهم 10 فكل 100 ألف نسمة، وتقاسو 50 لكل 100 ألف نسمة فكل من كازا، مراكش، طنجة، وبني ملال، وهذو هوما المدن اللي عرفو ارتفاع كبير فالإصابات هذ الأسبوع اللي فات.
وحتى معدل الناس اللي كتتلقى العلاج من "كوفيد 19" مرتفع، بحيث بلغ 34,5 لكل 100 ألف نسمة فالمتوسط، بينما هذ المعدل اختلف من جهة لأخرى، بحيث بلغ فجهات كازا ومراكش والداخلة 45 فأكثر، من 30 حتى ل40 فجهات فاس طنجة وبني ملال، من 15 ل30 فكل جهات الرباط ودرعة، وأقل من 15 فجهات الشرق وكَلميم وسوس والعيون.
والمغربزاد ب7 مراكز من ناحية عدد الإصابات على المستوى العالمي وولا دابا فالمركز 52، وزاد بمركز على المستوى الإفريقي وولا هو الخامس، وعلى مستوى الكشفات متغيراتش الرتبة ديالو، وبقا هو 33 عالميا، والثاني على المستوى الإفريقي واللول فشمال إفريقيا.