المغرب وقع اتفاقيات مع مختبر شينوي باش يشارك فالتجارب السريرية ديال لقاح كورونا.. وبوريطة: هادي شراكة مزيانة وحنا ثايقين فخبرة الصين

وقع المغرب مع المختبر الشينوي CNBG جوج ديال الاتفاقيات باش يديرو تجارب سريرية دلقاح فيروس كورونا المستجد (كوفيد 19).
الاتفاقيات بجوج توقعو عن طريق تقنية المحاضرة عن بعد، بين الرباط والعاصمة الشينوية بيكين، وبين جوج اطراف اللي هوما فالجانب المغربي وزير الصحة خالد آيت الطالب، وفالجانب الشينوي المسؤولين ديال مجموعة "Sinopharm CNBG".
شارك وهذ الندوة الرقمية وزير الشؤون الخارجية والتعاون الإفريقي والمغاربة المقيمين بالخارج، ناصر بوريطة، اللي قال أن هذ الاتفاقيات جات فإطار ترسيخ وتجسيد دينامية التعاون بين الرباط والبيكين، واكد انها بلا شك غادي تعطي بعد جديد لهذ التعاون.
وزاد: "غيولي لمجموعة "سونوفارم" حضور استراتيجي فالمغرب، والتعاون معاها غيجي ف3 أجزاء، جزء متعلق بالتعاون فمجال التجارب السريرية للاستعداد للمرحلة الثالثة دانتشار الفيروس، وجزء متعلق بالتعاون اللي غيكون على صعيد كلي "كَلوبال"، وجزء ثالث غيمكنا من تجاوز الدولتين والانفتاح على الجنوب والشمال ديالهم".
وهكذا، قال بوريطة ان اللقاح إيلا وجد غيكون فمتناول الجميع، وخصوصا القارة الإفريقية، وأكد أن المغرب والشينوا بهذ المبادرة "ختارو يواجهو الوباء بشكل فيه نشاط وتضامن"،
وعبر المسؤول الحكومي على ثقة المغرب فخبرة الشينوا ومصداقيتها، على اعتبار أن المغرب من ديما ختار الشينوا كشريك متميز فهذ الاختبار، "والمغرب عندو الحق فهذ الاختبار، حيت دعم الشينوا كان ثمين، وفعال وفيه سخاء كبير".