إجراءات تجهيز جناح "كوفيد 19" فمستشفى ابن طفيل فمراكش انطلقات اليوم – تصاور

الاجراءات انطلقات اليوم الجمعة لتجهيز مستشفى ابن طفيل فمراكش بجناح خاص، فالهواء الطلق، خاص بمرضى "كوفيد 19".
هذ المبادرة جات بعدما عطى وزير الصحة، خالد آيت الطالب، التعليمات ديالو، فاش دار زيارة مفاجئة للإقليم ليلة الأربعاء اللي فات، باش تتوسع الطاقة الاستعابية ديال السبيطار، وتتم إضافة "شابيطو" كيشمل عشرات الأسرة، وأقسام خاصة بالإنعاش وغرف التنفس الاصطناعي.
وعرفات مستشفيات مراكش فهذ الآونة الأخيرة اكتظاظ كبير، وبزاف دالمرضى نعسو فالأرض بسبب امتلاء جميع الأسرة، بالإضافة لقلة الأطر الصحية، وخصوصا فاقسام المستعجلات.
وباش تتحسن الأوضاع، دابا تم إعداد مستشفى ميداني جديد فبنكَرير كيشمل 380 سرير، وتجهيز سبيطار انطاكي بالكامل، مع اعتماد العلاج المنزلي لمصابي كورونا بدون اعراض او بأعراض خفيفة.