تاريخ العلاقات المغربية الاسرائيلية بدات من الستينات وبقات حتى اليوم. عطاو للمغاربة السلاح والميزان التجاري فصالحهم.. تل ابيب: ما جايينش نوقعو اتفاقيات سلام بل تعاون فهاد الميادين

تاريخ العلاقات المغربية الاسرائيلية بدا من الستينات. الملك الراحل الحسن الثاني سهل مامورية الفرق الصهيونية تجي للمغرب وتدي اليهود المغاربة ل"ارض الميعاد" اللي هي ارض الفلسطينيين. تقوات هاد العلاقات خاصة بين الملك الراحل ورجالات المخابرات الاسرائيلية "الموساد".
كاين وثائقي من 4 حلقات كيقدمو فيها كبار رجالات هاد الجهاز علاقاتهم بالراحل. دعمهم ليه بعد ما قرر جمال عبد الناصر يقتل الحسن الثاني.
المغرب فالستينات شرا اسلحة اسرائيلية كيف قالت قناة "اي 24" الاسرائيلية. طبعا بقى التعاون والعلاقات ولكن من التحت. كيقولو ان مؤتمر القمة العربية فالستينات واللي كانت فالمغرب ونقلها الحسن الثاني لاسرائيل خلات هاد الدولة توجد لحرب 67 اللي ربحاتها
لكن اول علاقات مباشرة بين الدولتين كانت ف1995. دار مكتب اتصال مغربي فتل ابيب ودار مكتب اتصال اسرائيلي فشارع المهدي بنبركة فالرباط. بقى 5 سنين وتسد بعد ما بدات الانتفاضة.
العلاقات الاقتصادية استمرت والتعاون خاصة الامني =التسلح= بقى. حسب وسائل اعلام اسرائيلية فالميزان التجاري فصالح اسرائيل. كتصدر لينا 70 مليون دولار وحنا يالله كنصدرو ليها 5 مليون دولار سنويا.
زيارة الوفد الاسرائيلي اليوم برئاسة جادير كوشنير مستشار رئيس امريكا ونسيبو ماشي غادية تكون غير لتدشين رحلة تجارية. اللا. غادية تكون وفق وسائل اعلام اسرائيلية مناسبة لتوقيع اتفاقيات فالطاقة خاصة الشمسية وفتحلية المياء وفالفلاحة وفالتكنلوجيات الحديثة وفالامن.
الاسرائيليون كيقولو راه ماشي اتفاقية سلام حقاش حنا فسلام مع المغرب بل اتفاقيات تعاون.