أكثر حاجة مهمة خاص المغرب يديرها دابا هي يخرج من جامعة الدول العربية لأن كاع داكشي لي منتمي ليه المغرب وفيه كلمة عربي ماوصلنا منو غير الصداع والمشاكيل

من بعد الفتوحات الديبلوماسية والسياسية والجغرافية لي دار المغرب مؤخرا، ومن بعد تجديد العلاقات بين المغرب وإسرائيل ، أكثر حاجة مهمة خاص المغرب يديرها دابا هي يخرج من جامعة الدول العربية وعلاش لا يساهم حتى في التفرتيك ديالها، ويخرج من أي تجمع دولي مبني على الإنتماء العرقي أو الديني، أي حاجة فيها عربي إسلامي يخرج منها المغرب، ومرحبا بأي تحالف إقتصادي واخا يكون حتى مع كوريا الشمالية، خاص تولي هادي العقيدة المغربية الجديدة ولي قديمة نوعا ما، راه منذ القدم عمرنا كانت عندنا علاقة مع الشرق مبنية على العرق او العقيدة، كانو إيما يجيونا غزاة إما نمشيو عندهم غازيين، حتى مولاي دري سراه جا هربان منهم ودار دولتو هنا منفصلة على الشرق، وهاكا بقات الأمور حتى جا بن تاشفين ودار إمارة المسلمين هنا وخلا ليهم إمارة المومنين القديمة يربحو بيها قبل مايجمع المغرب إمارة المسلمين والمؤمنين وحتى الملحدين مادام كايقولو عاش الملك.
راه سكان الجزيرة العربية براسهم وغادين وكيقطعو مع هاد التجمعات، حتى الى دولهم باقا متشبتة نوعا ما ولكن طالع عندهم جيل جديد قاري فاوروبا وميريكان وماجامعو مع العرب غير السمية، راه شاب سعودي قاري فميريكان القواسم المشتركة لي عندو مع واحد لاتينو في سان دييكو كثر ملي عندو مع واحد ايريتيري حتى هو دولتو داخلة في الجامعة العربية، لي غادي يكون مسقبلا راه هو الشراكات الإقتصادية المبنية على تعميم الرفاهية والكونيكسيو للجميع باش يعطيو رأيهم حتى هوما في السياسة ديال البلاد والعالم، ويديرو روتيني اليومي وولادهم يصورو فيديوات في تيك توك، السؤال ديال واش حنا عرب أو أمازيغ أو من قرطخنة كاع مابقى مهم دابا، الأهم واش كاين شي طرف ديال الخبز معاك ولا والو، وواش نشركو فالكاميلة.
كاع داكشي لي منتمي ليه المغرب وفيه كلمة عربي أو إسلامي ماوصلنا منو غير الصداع والمشاكيل، هاديك البوليزاريو راه كانو العرب والمسلمين لي كيمولوها ويشريو ليها السلاح ويدربوها غير ضد في المغرب، وغير على ديك البلد العربي الإسلامي كنا ديما كنتحسبو على الشرق الأوسط والصراعات ديالو والمشاكل ديالو، حتى الأجانب لي ثقافتهم الجغرافية متواضعة كانو كيعرفو أن المغرب بلاد عربية فيا الإسلام محسوبة على الشرق الأوسط عندهم صراع مع إسرائيل عندهم الحرب والإرهاب والمرة لابسة قيطون كحل، كاع مكتطيح عليهم أننا بلاد في اقصى شمال افريقيا بعاد على هاد المشاكل والصداع جغرافيا ولكن للأسف دخلوهم لينا الطابور الخامس، دابا راه الطريق واضحة وباينة المغرب بلد افريقي لاصق فاوروبا وهو صلة الوصل بين هاد جوج قارات، نشوفو قدامنا ونشوفو ورانا جنبنا كاين البحر وجنبنا لاخر كاين العروبة والإسلام والقضية الله يعفو عليهم وعلينا منهم.