نشرة كورونا نصف الشهرية: تحسن كبير فالوفيات والإصابات.. والوزارة اعترفات بنقص التحاليل بلا ماتفسر علاش.. وخسران المغرب مركز مشرف عالميا فعدد التيستات بسباب هادشي

علنات وزارة الصحة، فتصريحها النصف شهري، على تحسن كبير فالوضعية الوبائية فالمغرب، بحيث أننا فهذ السيمانة، من 28 دجنبر 2020 إلى حدود يوم الأحد 3 يناير 2021، سجلنا 245 وفاة بفيروس كورونا المستجد، بانخفاض ديال 13,4 فالمية بالمقارنة مع الأسبوع اللي فات، اللي كنا سجلنا فيه 245 وفاة، كيف أن عدد الوفيات الأسبوعية غادي وكينقص بشكل تدريجي.
وقال عبد الكريم مزيان بلفقيه، رئيس قسم الأمراض السارية، أنه حتى عدد الإصابات اللي تسجلو هذ الأسبوع الأخير نقصو بشكل كبير، بحيث تسجلات 11067، وهكذا نقص عدد الإصابات بالمقارنة بالأسبوع اللي فات ب26 فالمية، وهو الأسبوع اللي كنا سجلنا فيه 14954 إصابة، وحتى عدد الإصابات الأسبوعية غادي وكينقص.
أما بالنسبة لمعدل الإصابة الأسبوعي لكل 100 ألف نسمة، فحقق انخفاض ل30,3، بينما كان محدد ف48,7 فالأسبوع اللي فات، و55,4 فالأسبوع اللي قبل منو.
وفهذ النشرة، تبين كذلك أن الحالات النشطة غادية وكتنقص، بحيث وصلنا ل22521 حالة، بينما كنا قفلنا ذروة 49800 واحد كيتعالج من الفيروس قبل.
أما عدد المرضى اللي كاينين فأقسام الإنعاش فتزادو هذ السيمانة، بحيث بين 28 دجنبر و3 يناير، طلعو ل1128، بينما السيمانة اللي قبل هاذي كانو 1089، والسيمانة اللي قبل منها 1076، وعدد المرضى اللي فحالا خطيرة فهذ الاسبوع هوما الأعلى على الإطلاق بالمقارنة مع الأسابيع الأخرى.
وبالنسبة لمعدل الإصابة الأسبوعي لكل 100 الف نسمة حسب الجهات، تبين أنه انطلاقا من الأسبوع ما بين 14 حتى ل20 نونبر، ووصولا للأسبوع الأخير اللي كيتحدد ف28 دجنبر حتى ل3 يناير، المناطق الخضراء، اللي كتعرف انخفاض فالإصابات لأقل من 20 لكل 100 ألف نسمة، بدات كتتسع كثر وكثر، وتحددات فجميع مناطق المغرب تقريبا باستثناء السواحل الغربية وجزء من جهة سوس ماسة وكَلميم وادنون اللي كتعرف إصابات اكثر من 20 حتى ل50 إصابة لكل 100 ألف نسمة، وكذلك جهات العيون الساقية الحمرا والداخلة واد الذهب وبعض المناطق القليلة فالشمال والوسط اللي كتعرف إصابات أكثر من 50 ألف نسمة .
وبخصوص مؤشر توالد الحالات على الصعيد الوطني فنهاية الأسابيع اللي فاتو، فبلغ ف20 دجنبر 0,93، و27 دجنبر 0,91، و3 يناير 0,80، وهذا كيعني أنه غادي وكتنخفض.
وكاين انخفاض فمستوى الوفيات الشهرية، بحيث فدجنبر سجلنا 2673 وفاة، بمعدل 50 وفاة فاليوم، فالوقت اللي كان معدل الوفيات اليومي الشهر اللي فات 74، ووصلنا فالمجموع ل4812.
واعترفات وزارة الصحة، فنشرتها، بضعف تحاليل فيروس كورونا المستجد، بحيث أكدات ان المغرب تراجع بجوج مراكز عالميا على مستوى التحاليل وصبح كيحتل المركز 39.
وقالت الوزارة أن عدد الكشوفات ارتفع فالآونة الأخيرة، واخا عرف انخفاض كبير وملحوظ من مدة، بحيث تسجلات هذ الاسبوع الأخير 100 ألف تحليلة بينما تدارت فالأسبوع اللي قبل منو 90 ألف، وفجميع الحالات هذ الأعداد قليلة بالمقارنة مع 170 الف اللي كانت كتدار أسبوعيا قبل.