نشرة "كوفيد" النصف شهرية: 510 واحد مات و34237 تقاسو بكورونا و111 دخلو للإنعاش فسيمانة وحدة.. والمغرب خسر 3 مراكز فعدد التحاليل عالميا.. و23 فالمية من مجموع الكشوفات اللي كتدار إيجابية

التصريح النصف شهري ديال الوضع الوبائي فالمغرب المتعلق بالنصف الأول ديال شهر نونبر لاحتو وزارة الصحة بكري شوية، واقتصرات فيه فالهضرة على الأسبوع الأول من شهر نونبر.
وقالت فيه الوزارة اننا فهذ السمانة، إلى حدود يوم الأحد 8 نونبر، سجلنا 510 وفاة بفيروس كورونا المستجد، بزيادة ديال 10,6 فالمية بالمقارنة مع الأسبوع اللي فات، كيف ووصلو عدد الإصابات اللي تسجلو هذ الأسبوع الأخير، إلى حدود الأحد 8 نونبر، إلى 34237، وهكذا تزاد عدد الإصابات بالمقارنة بالأسبوع اللي فات ب36,6 فالمية.
وكشفات الوزارة فتصريحها أن الحالات فاقسام الإنعاش والعناية المركزة، فوصل فالأسبوع الأخير ل889 حالة حرجة، بمعدل 111 لحالة فهذ السيمانة، فالوقت اللي كان المعدل ديال الحالات الحرجة مكيفوتش 70 فالسيمانات الفايتة.
وتطور معدل الإصابة الأسبوعي لكل 100 ألف نسمة ل94,8، ووصل مؤشر توالد الحالات على المستوى الوطني ل1,22.
وبمقارنة معدل الإصابة الأسبوعي لكل 100 الف نسمة حسب الجهات فالأسابيع الثلاثة اللي فاتو، فمن 19 ل25 أكتوبر كان فايت 50 فكل من الأقاليم الجنوبية باستثناء جهة كَلميم وادنون، ثم جهة سوس، وجهة الرباط وكازا سطات، والجهة الشرقية، بينما فالأسبوع الموالي (بين 26 أكتوبر حتى ل1 نونبر) ولا معدل الإصابة فجميع الجهات فايت 50، باستثناء جهة درعة تافيلالت وفاس مكناس وبني ملال خنيفرة ومراكش آسفي وجهة الشمال، اما فالأسبوع الأخير فالتحقات جهة الشمال بالجهات اللي فيها المعدل فايت 50.
بالنسبة للتطور الأسبوعي لعدد الكشوفات ونسبة الإيجابية، فوصلات نسبة الحالات المصابة من مجمل التحاليل ل23,87 فالمية، فالوقت اللي كانت فالاسبوع الماضي مكتعداش 17 فالمية.
بالنسبة لوضع المغرب الوبائي على المستوى العالمي، فكيجي فالرتبة 32 عالميا، فعدد الحالات، والرتبة 36 فعدد الوفيات، والرتبة 34 فالكشوفات، بعدما طاح ب3 مراكز، وهذا كيعني أن عدد الكشوفات نقصو.
أما بخصوص وضع المغرب على المستوى القاري، فهو إفريقيا فالرتبة 2 فالإصابات، و3 فالوفيات، و2 فالكشوفات.