النشرة النصف شهرية لوباء كورونا: الوزارة تجنبات تهضر على نقص التحاليل اللي تسبب فنقص الإصابات.. وعدد الناس اللي فحالة خطيرة تزاد والوفيات نقصو

علنات وزارة الصحة، فتصريحها النصف شهري، أننا فهذ السيمانة، من 14 دجنبر إلى حدود يوم الأحد 20 دجنبر، سجلنا 333 وفاة بفيروس كورونا المستجد، بانخفاض ديال 12,1 فالمية بالمقارنة مع الأسبوع اللي فات، اللي كنا سجلنا فيه 379 وفاة.
وقال عبد الكريم مزيان بلفقيه، رئيس قسم الأمراض السارية، أنه حتى عدد الإصابات اللي تسجلو هذ الأسبوع الأخير نقصو بشكل كبير، بحيث تسجلات 17516، وهكذا نقص عدد الإصابات بالمقارنة بالأسبوع اللي فات، اللي كنا سجلنا فيه 19952 إصابة، ب12,2 فالمية.
أما بالنسبة لمعدل الإصابة الأسبوعي لكل 100 ألف نسمة، فحقق انخفاض ل48,7، بينما كان محدد ف55,4 فالأسبوع اللي فات، و71,8 فالأسبوع اللي قبل منو.
لكن فالمقابل الوزارة ماتكلماتش على ضعف التحاليل المخبرية، ومدى تأثيرو فتقليل الإصابات بالفيروس، كيف تحاشات تدير ترتيب المغرب على المستوى العالمي والقاري فالوضعية الوبائية باش مايبانش تراجع المركز ديالو فعدد الكشفات.
أما عدد المرضى اللي كاينين فأقسام الإنعاش فتزادو هذ السيمانة، بحيث بين 14 و20 دجنبر، طلعو ل1076، بينما السيمانة اللي قبل هاذي كانو 977، والسيمانة اللي قبل منها 984.
وبالنسبة لمعدل الإصابة الأسبوعي لكل 100 الف نسمة حسب الجهات، تبين أنه انطلاقا من الأسبوع ما بين 14 حتى ل20 نونبر، ووصولا للأسبوع الأخير اللي كيتحدد ف30 حتى ل6 دجنبر، المناطق الخضراء، اللي كتعرف انخفاض فالإصابات لأقل من 20 لكل 100 ألف نسمة، بدات كتقلال، وتحددات ففاس مكناس، ودرعة تافيلالت، بالإضافة لإقليم أوسرد وطرفاية.
أما بالنسبة للمناطق الحمراء اللي الإصابة فيه كتفوت 50 فكل 100 ألف نسمة فتموقعات فكازا، وبضع مناطق فالشمال، والرباط سلا القنيطرة، ومراكش آسفي، وسوس ماسة، وكَلميم وادنون، وإقليم واد الذهب.
وبالنسبة لمؤشر توالد الحالات على الصعيد الوطني فنهاية الأسابيع اللي فاتو، فبلغ ف13 دجنبر 0,85، و20 دجنبر 0,93، وهذا كيعني أنه غادي وكيتزاد، فالوق اللي كان انخفض فالآونة الأخيرة.
وكاين انخفاض هذ الشهر فمستوى الوفيات الشهرية، بحيث فال20 يوم اللولة من دجنبر سجلنا 3039 وفاة، بمعدل 56 وفاة فاليوم، فالوقت اللي كان معدل الوفيات اليومي الشهر اللي فات 74، ووصلنا فالمجموع ل4812.