ها لبلاصة اللي غادي يتحط فيها الڤاكسان قبل ما يتفرق على الجهات وها شكون غادي يحمي الشحنة حتى توصل لبنمسيك وغير الاعلام الرسمي اللي غيحضر

الطيارة اللي جايبة الڤاكسان د"كورونا فيروس" من الهند غادية توصل فحدود الجوج هاد الظهر جايبة ڤاسكان لمليون وشي براكة من لمغاربة. غادية توصل الشحنة يجيبو ليها كاميوات كبار مناسبة ليها. الجدارمية هما اللي غاديين يديرو ليها الكورطيج. فالمطار غادي يحضر غير الاعلام العمومي سواء التلفزيون او وكالة المغرب العربي للانباء.
الوجهة غادية تكون هي الوكالة المستقلة للتثليج اللي كاينة فحي لالة مريم قريبة لمارشي كريو وعمالة بنمسيك سيدي عثمان فكازا.
هاد الوكالة اللي كانت تأسسات ف1969 بقرار من المجلس الحضري للدار البيضاء وقرار صادر لوزارة الداخلية بعد حل شركة التبريد المغربية٬ تبنات فهاد الحي على شطرين. الاولى ف1988 وسعتها 5 الاف طن فالبداية قبل ما تولي 10 الاف طن فنهاية 1992 كانت طلعات ب120 مليون درهم.
الوكالة المستقلة للتثليج تابعة لوزارة الداخلية. هاد الوكالة اذن هي اللي غادي يكون فيها جوج مليون دوز لتلقيح مليون مغربي. غادية تستقبل الدفعات الجاية من الڤاكسان.
من هاد الولاية غادي يتوزع فاكسان استرازنيكا اوكسفورد على جهات المغرب 12. الداخلية تتكلف باللوجستيك والمديريات الجهوية للصحة باللقاح