عريس وعروس دارو عراسية فطنجة وباش جا البوليس هربو ومعاهم المعروضين

وبنادم ما عندو عقل. باغي عراسية زمن كورونا. هاد الشي اللي وقع لوحدين فطنجة. البارح الاثنين البوليس بامر من النيابة العامة٬ عرف كاين عرس فطنجة البالية فشي فيلا وجا. لقى عراسية سرية.
اللي مثير وفق مصدر "كود" هو ان لعريس ولعروسة هربو قبل ما يشدهم البوليس باش يزمم ليهم مخالفة. فالمقابل حصلو 35 تماك وكلشي غادي يخلص: الغرامة وشوف واش النيابة العامة غادية تقدمهم. المتابعة كاينة
وفق مصدر "كود" فالعريس ولعروس من عائلتين من مموني الحفلات شوفو الكلاخ. تحداو كلشي ودارو العراسية وحقاش عارفين قوالب لعراسات هربو العريسين وهربو حتى بزاف المدعويين.
البوليس بالاضافة الى 35 معروض حصل٬ حجزو على المالكة والات الموسيقى وداك الشي ديال النگافات.