واش هادي حكومة المغرب ولا شي دولة اخرى. مجلس حكومي كيهدر على فلسطين ومخلي فضايح سبتة وتهديدات الصبليون

بيان المجلس الحكومي اللي دار اليوم فضيحة بكل المقاييس. اطفال رضع وقاصرين ونساء وشباب حرگو لسبتة المحتلة. حدث العالم كولو نقل صورو. الحكومة ضربات الطم. تسنيا اليوم الخميس. والو والى كلمة. حدث عندو تداعيات جيوسياسية كبيرة على المنطقة. اسبانيا كلها معبأة ورسلات جيشها. الخارجية المغربية استدعات سفيرتنا احتجاجا على زيارة سانشيث رئيس الحكومة الاسبانية. ووالو والى حرف واحد.
قمة الاحتقار للمغربي. قمة الاهانة لشعب شاف بلادو خدمات بيه. خلاتو يدخل ودخلاتو فقضية معقدة. 8 الاف مغربي او اكثر دخلو وفيهم الفين قاصر. هاد الشي ما فراسش بنعرفة. وزير الدولة المكلف بحقوق الانسان خرج تدوينة كيفسر فيها هاد الشي وكيهاجم اسبانيا. حتى هادي ما فراسش الحكومة.
العبث وصافي. حسب البيان فرئيس الحكومة بدا هاد الاجتماع بعد الهدرة على العيد الصغير وتزامنو مع الاجراءات٬ ثم جبد فلسطين. اييه بنعرفة عندو فلسطين اهم من سبتة. اهم من احداث سبتة. هدر على داك الشي اللي رسل رئيس الدولة من مساعدات. هدر بأن "المغرب لن يتخلى أبدا عن الشعب الفلسطيني وعن الدفاع عن حقوقه". ما عرفناش شكون عطاه الحق يهدر باسم لمغاربة باش قال بغباء "عبَّر الشعب المغربي قاطبة على انخراطه في هذا التوجه وتعاطفه الكبير مع الشعب الفلسطيني". هاد قاطبة كاينة غير فكورويا الشمالية.
بعد هاد الشي كولو عاد هدرو على الوضعية الوبائية وعلى دراسة مشاريع قوانين والمصادقة عليها.
سبتة واللي وقع فيها. دابا بنعرفة شاد لانطير مع فلسطين. واش نسى هاد الصباح وزيرة الدفاع الاسبانية روبليس اللي قالت علينا "العدو" اللي كيشكل خطر على دولتهم. ما شافوش دوك الصور اللي هي اهانة لشعب. اهانة لكاع لمغاربة