تأجيل محاكمة الراضي حتى ل15 يونيو.. النيابة العامة رفضات طلب إجراء الخبرة الطبية على المشتكية.. ورفضات استدعاء واحد من الشهود

اجلات غرفة الجنايات الابتدائية بمحكمة الاستئناف بالدار البيضاء، اليوم الثلاثاء، محاكمة الصحافي المعتقل عمر الراضي وزميلو عماد ستيتو حتى ل22 من هذ الشهر.
وعرفات جلسة اليوم تدخل ممثل النيابة العامة، اللي طالب برفض الدفوع الشكلية اللي تقدمو بيها دفاع المتهمين، كيف رفض ملتمس دفاعو إجراء خبرة طبية على المشتكية حفصة بنطاهر، حيت هذشي كيدخل فإطار الطلبات اللاحقة خلال تجهيز القضية.
وأكد نائب الوكيل العام انه كيتابع الوضع الصحي للراضي بشكل دائم، وأنه كيحظى بعناية طبية، واستفد من 41 فحص داخلي و5 فحوصات خارجية و19 فحوصات ديال الدم، وان مرضو المعوي ديجا كان فيه قبل ما يدخل الحبس.
ورفضات النيابة العامة كذلك ملتمس دفاع الراضي واستيتو بإحضار احد المصرحين، على اعتبار أنه ماكانش حاضر ليلة واقعة الاغتصاب المفترض.
وجلسة اليوم عرفات مشادات كلامية بين طرفي الدفاع، أدات لرفعها مرات كثيرة من طرف القاضي علي الطرشي.
وكانت بدات محاكمة الراضي مع 1 ديال الظهور، وما سالات تقريبا حتى ل9 ونص ديال الليل.
ومتابع الراضي بتهم تلقي أموال من جهات أجنبية بغاية المس بسلامة الدولة الداخلية، بالإضافة لجناية هتك العرض بالعنف والاغتصاب، واستيتو متابع بالمشاركة معاه فهذ الجنايات
وتزامنات محاكمة الراضي اليوم مع محاكمة الصحافي المعتقل سليمان الريسوني، اللي حتى هيا سالات فوقت متأخر، غرجعو لتفاصيلها بعد قليل.