واش هادي وقتها؟.. البي جي دي غادي يستقبل زعيم حركة حماس المصنفة دوليا منظمة ارهابية

اسماعيل هنية رئيس حماس، غادي يجي للمغرب لأول بدعوة من حزب العدالة والتنمية. حيث من المرتقب يوصل اليوم رفق وفد من مسؤولي الحركة.
حركة حماس المصنفة دوليا ومن طرف الخارجية الأمريكية بأنها حركة ارهابية، غاتجي للمغرب فهاد الظرفية، اللي تطورات فيها العلاقات بين المغرب واسرائيل.
هاد الخطوة اللي دار البي جي دي جات مباشرة بعد تهنئة الملك لرئيس الوزراء الاسرائيلي نفتالي بينيت بعد تشكيل الحكومة الجديدة في تل ابيب.
رئيس الحكومة اللي من البي جي دي هو اللي وقع اتفاقية التطبيع، هو اللي عيط لهنية باش يجي. تناقض كبير. خصوصا وأن هادشي اللي دار البي جي دي كيتناقض مع الخطاب الرسمي اللي كيحذر من النفوذ الايراني فالمنطقة، علما أن ايران كاتحكم فحماس.
اشنو الرسالة اللي بغا يوصل البي جي دي بهاد الخطوة؟ واش هادي ورقة يضغط بها على الدولة ولا هادشي تم في اطار التنسيق مع الخارجية بحيث فحال هاد الضيوف كيخص الاذن قبل.
حماس جايا بوفد كبير من مسؤوليها، وباغين يتلاقاو الاحزاب السياسية، كيبقا السؤال واش جميع الاحزاب غادي تستقبلهم، بما فيهم الاحزاب اللي ضد الاخوان المسلمين وضد الحركة.