أثار المقال الذي نشرناه صباح اليوم حول توقعات الأمانة العامة لحزب العدالة والتنمية للانتخابات المقبلة، ردود أفعال من طرف قياديين من البي جي دي وقيادي من حزب الاصالة والمعاصرة. التوقعات اللي عطات المرتبة الأولى لحزب الحمامة بمقاعد تقدر تفوت 95 مقعد، اعتبرها مصدر فالبي جي دي مبالغ فيها، وبأن قادة الحزب فالمهرجان يؤكدون بأن "المصباح غايجي لول". عضوين فالأمانة فالبيجيدي قالوا ل"كود" بلي :"المعطيات الموضوعية المتوفرة تقول بأن العدالة والتنمية هو من سيتبوأ المرتبة الأولى في الانتخابات المقبلة، وهذه قناعة لدى كافة القيادة السياسية للحزب وهي التي تروج على لسان قيادييها في المهرجانات وفي اللقاءات الداخلية والإعلامية والإشعاعية". هوما كينفيو، ولكن مصدر قيادي فحزب البي جي دي أكد ل"كود" بلي هاد التوقعات مبنية على معطيات تجمعات فالأقالم، وعطا 6 جهات هاد الحزب ضعيف فيها بزاف وميقدرش يجيب، و20 دائرة حظوظو فيها ضعيفة. قيادي وعضو المكتب السياسي للبام، بدوره تفاعل مع مقال "كود"، مصرحا بأن "البام مؤهل للمنافسة على المرتبة الأولى وغادي يجيبها وتاهو عندو معطيات تخصه في هذا الشأن"، مضيفا أن "مكاينش شي حزب يقدر يوصل 100 مقعد والأحرار غايجيب الرتبة الثالثة". حرب التوقعات بدات، الأحرار كيقول كلام والبي جي دي منقسم (كاين رأي كيقول بلي مغايكونوش لولين ورأي آخر كيقول غايجيو لو)، والبام والاستقلال تاهوما كيقولو كينافسو على الرتبة الأولى. رابط المقال لي نوض حرب التوقعات بين الأحزاب: سكوب. توقعات أمانة البي جي دي لنتائج انتخابات 2021: الأحرار أولا ويقدر يوصل 100 مقعد والمصباح ميقدرش يفوت 75 مقعد برلماني
