طرد الصحافيين الاسبان خطأ وتضييق على حرية الصحافة واللي تزامن مع محاكمة الريسوني وافتتاحية "نيويورك تايمز" واثارة وزير خارجية امريكا للموضوع

البارح طردات السلطات المحلية فالشمال فريق صحافي برنامج "سالبادوس" اللي كيكون ف"لاسيكستا" الاسبانية كان باغي يحقق ففضيحة حنا مازال ما عرفناش اش وقع فيها وهي فاجعة معمل سري فطنجة وقعات ففبراير اللي فات وتقتل فيها 29 شخص فلاكاب ديال ڤيلا. البرنامج قال باللي بغى يدير حوار مع عائلات الضحايا وباللي تعتاقلو قبل ما يتم ترحيلهم.
هاد القناة جات دير تحقيق حقاش كانت هدرة كتروج ان هاد المعمل السري او غير سري كيصدر الحوايج اللي كيصايب لاسبانيا.
دابا هاد القرار ديال طرد 5 صحافيين فيهم 4 اسبان واخر ايطالي بحجة انهم بغاو يديرو ربورطاج بلا التراخيص اللازمة غير تخربيقة وصافي.
حنا عارفين باللي هاد القناة ايلى طلبات تراخيص على هاد الموضوع غاديين يرفضو ليها. تصورو البرنامج يرسل لوزارة الاتصال ديالنا: بغينا نستجوبو عائلات 29 ضحية المعمل السري. يستحيل يقبلو.
هاد الاستهداف للصحافة فهاد الوقت غريب ومبالغ فيه. اليوم كاينة محاكمة سليمان الريسوني وسط خوف كبير على صحتو بسباب اضرابو على الطعام المستمر. دابا كيقولو باللي وقف تناول السكريات كيف قالو محاميه. نيويورك تايمز دارت افتتاحية على الموضوع وحرية الصحافة فالبلاد.
وزير خارجية امريكا جبد الموضوع مع وزير خارجيتنا. جبد حتى حقوق الانسان. امريكا بايدن باغية تبقى مستمرة فالاعتراف بمغربية الصحراء ولكن عندها شروط اولاها الحقوق والحريات فالبلاد عامة وفالصحرا خاصة تتقوى.
هاد منع الصحافيين باش يديرو خدمتهم خطأ من السلطات المغربية. المنع ما كيعطي الا صورة مقودة على بلادنا. ومع التكنلوجيات الحديثة كيضر لبلاد وصافي. حقاش غاديين يديرو الخدمة اللي بغاو بطريقة او باخرى.
خاص انفراج اليوم قبل غدا. البلاد اللي لقحات 34 بالمائة من ساكنتها والبارح وقعات اتفاقيات قدام رئيس الدولة باش نوليو نتجو 5 ملايين ڤاكسان سينوفرام فالشهر٬ ما تستاحقش تخسر صورتها بقرارات بحال منع صحافيين يديرو خدمتهم.