باش يصححو اخطاء بنصالح. الباطرونا: حنا ما كندعمو حتى شي حزب سياسي وغاديين نخدمو مع للي ربح الانتخابات

دارت خبار البارح باللي الاتحاد العام للمقاولات بالمغرب كيدعم حزب او شي احزاب صغيرة. "كود" سولات الباطرونا على شكون ممكن يدعموه فانتخابات 8 شتنبر التشريعية، جواب قيادي منهم واضح "حنا كندافعو على مصالح الشركات المغربية من الصغيرة حتى لكبيرة. حنا ما كنديروش السياسة وما غادينش نخليو الباطرونا تدخل فمتاهات السياسة" يضيف مصدر "كود".
ثم شدد علي ان القيادة الحالية واضحة وحاسمة فاختياراتها: كلشي الاحزاب السياسية اللي كتنافس فهاد الانتخابات عندنا بحال بحال واللي غادي يربح الانتخابات غاديين نتعاملو معاه دفاعا على مصالحنا.
الباطرونا اللي كيقودها فهاد المرحلة شكيب لعلج غادي يكون عندها 8 اعضاء فمجلس المستشارين. هادو وفق مصادر "كود" غاديين يكونو مدافعين على مصالح الشركات المغربية واي برنامج غيدعم هاد الشركات غاديين يدافعو عليه واي برنامج غادي يكون ماشي فصالح هاد الشركات غاديين يواجهوه وينتاقدوه ويصححوه.
الباطرونا مع الرئيسة السابقة مريم بنصالح كانت دخلات فمتاهة السياسة وما خرجاتش منو. كانت فبداية حكومة بنكيران 2011 ولات معارضة سياسية ماشي منظمة مهنية مدافعة على الشركات.