بعد رحلتو السياحية للفضاء.. الملياردير البريطاني ريتشارد برانسون رجع للمغرب يرتاح.. وسورفا فالداخلة ودار جولة بالبيكالة فقصبة تمادوت – تصاور وفيديو

بعد العودة ديالو من الرحلة اللي دارها للفضاء مؤخرا، باعتبارو أول سائح فالفضاء فالعالم، الملياردير البريطاني ريتشارد برانسون جا يحيد عليه الستريس ويسورفي فواحد من أجمل الشواطئ المغربية فالداخلة.
وعبر رجل الاعمال اللي كيبغي المغرب بزاف ومستثمر فيه من هادي سنين، على الإعجاب ديالو بمدينة الداخلة، وقال فتدوينة ليه أنا البحر وبحيرات كاينين تماك زوينين بزاف، والريح على مدار العام كتوفر ظروف مثالية للرياضة وركوب الأمواج.
وكشف انه سورفا غير مع الشباب، وحس براسو رجع مراهق لمدة 24 ساعة، واخا فعمرو 71 عام.
وقبل ما يوصل لهذ لابلاج باش يدير "الكيت سورف"، داز الملياردير على قصبة تمادوت نواحي مراكش، وهي البلاصة اللي شرا هادي سنوات، واللي دار فيها فيديو كيبان فيه كيدير البيكالا.
https://www.instagram.com/reel/CTRkwnPjSy_/?utm_source=ig_web_copy_link
ودار برانسون الجولة ديالو السياحية، اللي تقاسمها مع المتابعين ديالو على مواقع التواصل الاجتماعي، ومشى شاف المبادرات الإنسانية اللي داير فالمنطقة واللي كدخل الفرحة على الساكنة، بالإضافة لمشروع للحياكة كان دارو لروح الام ديالو اللي توفات.
Wonderful to spend time with the @EveBranson Foundation team in Morocco. Such a special foundation doing amazing work with brilliant people https://t.co/H1UuA76rVA pic.twitter.com/Loq5ynriVD
— Richard Branson (@richardbranson) September 1, 2021
Great to visit Kasbah Tamadot – a beloved place for my mum, so a very special visit for our family https://t.co/H1UuA76rVA pic.twitter.com/HonM1Q1rcR
— Richard Branson (@richardbranson) September 1, 2021
ودعا رجل الأعمال السياح باش يجيو يكتشفو القصبة، اللي قال أنعا سحراتو فاش اكتشفها، وبقى ديما يجي ليها.