وغير باراكا يا البام وغيرو من تعمار الشوارج وتجبدو بنشعبون والعلمي. راه ما كاين غير اخنوش اللي غادي يتكلف بتشكيل الحكومة وهاد الشي يقدر يوقع فالساعات الجاية

من مدة هادي كان الاتجاه ديال احزاب بحال العدالة والتنمية والبام وجهات اخرى فالدولة كتروج باللي حتى ايلى ربح التجمع الوطني للاحرار٬ راه الملك غادي يكلف شخص اخر من غير رئيسو عزيز اخنوش باش يشكل الحكومة. هاد الشي قالوه ناس التراكتور. قالو بنكيران قالو الازمي الادريسي.
باش وقع التسوماني ول البارح لاربعا٬ ورجع البي جي دي حزب صغير بزاف ما عندوش فريق فالمجلس النواب٬ اصوات البي جي دي ما بقى عندها معنى لا سياسي ولا غيرو. المواطنين جراو عليهم بصنادق الاقتراع.
لكن شي جهات محسوبة على البام وشي جهات اخرى بقات كتروج لهاديك اللازمة. اه حگى راه رئيس الحكومة غادي يكون شخصية اخرى من غير اخنوش. اه غادي يكون بنشعبون. اه غادي يكون العلمي.
ووالو٬ غير باستحضار مغرب بعد دستور 2011 راه الملك غادي يكلف غير عزيز اخنوش لانو رئيس الحزب الفائز. راها مع بنكيران جوج مرات. يعني عندنا سابقة. دارها معاه ف2011 ودارها معاه ف2016 وبعد ما فشل ف2016 فتشكيل الحكومة ما قلبتش علي اي شخصية فالحزب بل مشى عند الرجل الثاني اللي كان هو رئيس المجلس الوطني للعدالة والتنمية وعين بنعرفة رئيسا للحكومة.
يعني ان سيدنا ديموقراطي. واخا عندو الصلاحية من خلال الفصل 47 من الدستور باش يعين رئيس حكومة من الحزب الفائز٬ راه حريص كثر من عدد من مدعي الديموقراطية فبلادنا علي تطبيق ديموقراطي لهاد الفصل. كيعين ديما الرجل الاول فالحزب. ايلى فشل كيمشي للثاني. يعني كاينة تراتبية
فالاحرار راه بنشعبون واخا محسوب على الحزب ما كيحضرش حتى للمكاتب السياسية. يعني حظوظو صفر فصفر يكون رئيس حكومة. مولاي حفيظ العلمي كيحضر ولكن غاب فهاد الحملة الانتخابية فالمقابل دعم بزاف حزبو ووقف مع صاحبو٬ ولكن ما كيعرف والو فتنظيم الحزب. يعني من المستبعد جدا يكون رئيس حكومة.
بيناتنا الساعات الجاية اللي من المتوقع يكلف بيها رئيس الحكومة من التجمع الوطني للاحرار لتشكيل الحكومة. غادي يكون اخنوش. غادي يكون اللي يستحق هاد المنصب. خدم وربح وجاب 102 مقعد فمجلس النواب. دخل للتاريخ السياسي حقاش طيح البي جي دي اللي يالله جاب بزز 13 مقعد