واش الشعب طرد العشابة باش يجيو بلاصتهم الشلاهبية ؟ هاد مظاهر ديال التهيميج السياسي راه مالايقاش لمغرب 2021 ! رئيس جماعة مهرب مرشحين ! واحد انتحر ! وحدين مرايشين على منصب ! رئيسة كاتلوز مع الدقايقية احتفالا بالفوز ! هادشي ماكايبشرش بالخير

المغرب غادي مزيان فالاوراش التنموية ديالو ! هادشي كايبان فمجموعة من المجالات من بينها الطرقان ! هاد الصيف جربت بزاف ديال الطرقان فالمغرب و كلها تقريبا كانت مزيانة و على جودة عالية ! و حتى لي مازال خاصها الخدمة راه كايبانو ليك الورشات و اعمال التثنية باش يضوبلو الطريق خدامين ! فالشمال مثلا و شرق المملكة كاينين شي طرقان شحال هادي مايمكنش يشدهم الواحد بلا مايشهد بقوة الڤيراجات و الحفاري و الضيق ! دابا الحمد لله كاتلقا قدامك طريق زربية دوبل ڤوا و هادشي راه من مظاهر التقدم لي كاتخلي المغرب هوا جنة افريقية بالمقارنة مع گاع الدول الافريقية و بالخصوص دول الجوار !
و الصراحة كانحس بالفخر فاش كاندوز فدوك الطرقان و كانفرح لبلادي و لكن فاش كانحل التيليفون و ندخل لفايسبوك باش نشوف هذا مرشح اقتل راسو من اجل منصب سياسي و هذا مرشح آخور طايح سخفان كايمثل ! و هادي رئيسة كاتلوز مع الدقايقة فرحانة بنشوة الانتصار بواحد الشكل مجلخ ! هادو مرشحين كايتعاطاو الكازي هاك لمك هاد لباك ! هادشي كايطيح عليا الضيم ! واش الشعب نهار ثمنية شتنبر جرا على العشابة باش يحط بلاصتهم الشلاهبية و الشفارا و الكذابة و النصابة ؟! واش غانرجعو نقولو ديك الهضرة ديال " وا اوموان الاخرين ماكانوش كايشفرو ؟ " حيت مايمكنش هاد مظاهر التهيميج السياسي لي وليت كانشوف مؤخرا و لي لا تليق بمغرب 2021 ! مغرب الطرقان و لوطوروت ووزينات السيارات و لايرونوتيك! مايمكنش فينما كاين شي شلاهبي مابغاش يفيق مع الثمنية و يضرب تامارا على راسو باش يصور طرف د الخبز ينوض يتوجه للسياسة كحل باش يصوڤي !
مايمكنش نحس بالندم على العشابة انا لي ماكانحملش فدين أمهم الشعرة !
مايمكنش هاد التهيميج و تاعروبيت و " البلطجة" السياسية لي كادل على حاجة وحدة انه هاد الناس ماترشحوش باش يخدمو المواطن بل باش " يخدموه" بالمعنى الكازاوي للكلمة!
آو گاع هذا حب الوطن و گاع هادي رغبة فخدمة المواطنين تاوليت كانشوف التقاميش و التناتيف و القتيلة و الدم فصفوف المرشحين ؟ مايمكنش !
و كاتسولو علاش كاين عزوف ؟ علاش المواطن ماعندوش الثقة ؟
اشمن ثقة غاتكون عند المواطن هوا كايشوف بعينيه بلي تعيا ماتختار فولاد الكلبة تهز جرو !