سيتم حجب هذه الصورة تلقائيا عندما يتم الإبلاغ عنها من طرف عدة أشخاص.
"ماما بعت الاسهم ديالي فالشركة د بابا" شي حد يقول لكتاب السيناريوات فالمسلسلات المغربية بلي المغاربة لي عندهم الاسهم ماكايهضروش عليهم بهاد الطريقة بتاتا و بلي " سمح ليا حيت هزيت صوتي" ماكايگولوهاش عباد الله حيت كاينة كلمة "غوت عليك" فالدارجة !
كاين واحد الفيديو فيوتوب ديال الممثل المصري محمد رمضان بعنوان " النجم محمد رمضان يشرح اصول المعلمة" لاتفرجتي فيه غادي تلقا الممثل كايعاود و كايقلد كيفاش " المعلمين" بالفتحة على الميم الاولى و الشدة على اللام كايتعاملو فمصر! كيفاش كايهضرو كيفاش كايتمشاو كيفاش كايوقفو، كيفاش كايتعاملو فاش كايكونو قدام شي "معلم" آخر ! السيد مشا و جلس و شاف دوك ليديطاي الصغار لي كايعطيو لشخصية "المعلم" مصداقية و عرفهم و خدم عليهم و قادر يمثل شخصية المعلم بحرفية عالية ! و ماشي هوا اول مصري غانشوفو كايهضر على شي شخصية بدقة كبيرة ! كاينين بزاف د الممثلين فحواراتهم كايعطيو شي تفاصيل على الشخصيات لي كايمثلو دقيقة بزاف ! هاد الفيديو تفكرتو البارح وانا كانسمع فالاشهار د واحد المسلسل مغربي جملة " ماما بعت الأسهم ديالي فالشركة" ! ماعرفتش واش كتاب الحوار فالمغرب و السيناريستات ماعايشينش معانا ! لي كتب هاد الحوار واش عمرو تعاشر مع شي حد لاباس عليه و عندو " الأسهم" و شافو كيفاش كايهضر و لا غا ترجم الحوار من شي مسلسل عربي ! حيت لي عندهم "الاسهم" فالمغرب ماكايهضروش عليهم بهاد الطريقة و تلقا الاغلبية الساحقة فيهم ماعارفينهمش اصلا سميتهم " الأسهم" ! اذن علاش هاد الجملة لي ماعند بوها اصل فالواقع نسمعها فمسلسل مغربي ! "سمح ليا حيت هزيت عليك صوتي " الجملة لي قالتها السعدية لاديب لراجلها المختار فمسلسل ابو البنات تاهي مثلا ماكاتقالش فالدارجة ! المغاربة كايقولو " سمح ليا حيت غوت عليك" ! " هزيت عليك صوتي" هي الترجمة الحرفية د الجملة المصرية " رفعت عليك صوتي يا هريدي يا خوووي" ! سي "الوعدودي " المدير د الشركة لي غادي يقول لياسين احجام " سي جامع ! باش نعطيك مدير د المعمل ! خاصك تجمع راسك شي شوية حيت غايكونو عندك السفريات و الجمارك" هههههههههههههه انا كإنسانة خلاوها فرانسيس Elle a roulé sa bosse فهادشي د الشركات كانحلف ليكم ! و عليا بالحرام وولادي حرام عليا ماعمر هاد الحوار طرا فشي شركة مغربية " و ماكاين تا شي مدير شركة مغربي كايهضر بهاد الطريقة اللهم لاكان جاي من السودان ! المغاربة ماكايقولوش " السفريات" كايقولو " التسافير" و "الجمارك" هي " الديوانة" واش الناس لي كايكتبو السيناروات و الحوارات د المسلسلات المغربية ماساكنينيش فالمغرب ؟ ماراضينش بالدارجة ؟ و لا حيت ام بي سي سانك خاصنا نكذبو و نخبيو الكلمات الفرنسية لي مكون اساسي فالدارجة المغربية ؟ واش الممثلين ماعندهمش الحق يبدلو فالحوار ؟ واش الممثلين لي اغلبهم من خريجي المعهد ماعارفينش هادشي ؟ بزاف د الاسئلة كانطرحها على راسي فاش كانشوف هاد التكرفيص لي كايتكرفصو على الدارجة حيت حتى دوك المصريين لي كايترجمو عليهم راهم كايجيبو واحد السيد كايخدم غا على " التصحيح اللغوي" فاش كايكونو غايمثلو دور " صعايدة" و خاصهم يهضرو بلغة "ناس الصعيد" حيت اللغة مهمة بزاف و هي لي كاتعطي مصداقية للتمثيل ! يكفي انك تخورها باش مانبقاش نشوف فيك ديك الشخصية لي باغي تمثلها حيت لاتشبه للشخصيات لي كانشوف و كانعرف! مايمكنش مدير شركة كايقول " ضروري خاصنا نربحو هاد المناقصة !" المو شنو ؟ المو وات؟ "الموناااقاااصااا" ايوا يعميه لالقيتي شي مدير د الشركة و لا اي سطاجير صغير فاي شركة فالمغرب كايستعمل كلمة " مناقصة" عوض " ابيل دوفر" ! گاع المغاربة كايگولو لابيل دوفر حتى لي ماقارينش ! و حتى المقابل ديال كلمة "ابيل دوفر " فالسيت الرسمي ديال ليزابيل دوفر ديال الدولة الترجمة ديالها هي "طلبات العروض" ! كلمة مناقصة بعييييييييدة على الاستعمال فالمغرب و كاتستعمل بزاف فمصر و دول الخليج وي ! و هادشي "كوووم" و المواضيع "كووم" ثاني ! حيت بالموازاة مع اللغة الهجينة لي وليت كانسمع فالتلفزة حتى بعض المواضيع لي ولاو كايدويو عليها حتى هي ماكاتهمش بشكل مباشر المجتمع المغربي او على الاقل ماشي بنفس الحدة لي كاينة فالمجتمعات الشرقية ! مثلا "اهمية الولد بالنسبة للاب" ! مسلسل كاااامل القصة ديالو كادور على المرا لي سرقات و لا جابت ولد ماشي ولدها مع الراجل لي مزوجة بيه باش راجلها يعجبو الحال و مايطلقهاش و كاتسمعها كاتقوليه " جبت ليك الولد لي يحمل سميتك" وا لالة كيفاش يحمل سميتو ؟! آش هاد السينارويات ديال دول ختان البنات ؟! فالمغرب قليل قليل لي كايفكر بهاد الطريقة ! لي مهوسيين بالولد هوما الطبقة المسحوقة و حتى هوما مع الوقت مابقاوش بغاو الولاد حيت كايخافوه يخرج مشرمل و يبدا يضرب ليهم يديه و يخطف لمو البزطام باش يشري قاقة! واش عايشين فالمغرب و لا فالمنوفية ؟! حيت المغرب اغلب الاسر طالبين على ولادة البنت واش ماعمركم ركبتو فشي طاكسي و سمعتو ديك " اللهم البنيات بعدا آخويا حنانات ! اللهم البنيات البنيات بعدا كايقراو …" هادشي لي كاين فالواقع و فالتلفزة جوج مسلسلات مغربية مقاتلين ليا على نفس السيناريو لي عاطي اهمية كبيرة لولادة الولد! لي لاباس عليهم فالمغرب راه الاغلبية الساحقة فيهم ماكايقلبوش على الولد و لي جا مرحبا بيه ! و لاكانت بنت كاتكون فرحتهم كبيييييرة قداش هي ! كايسميوها على سميت جداها " لالة غيتة بناني التيجاني السملالي اليعقوبي سوسان" و كايقريها باها فليسي ليوطي ولا ديكارط و لا فيكتور هيغو و كايخسرو عليها الزبابل د الفلوس باش تكمل قرايتها و تشد الشركات د باها و تسيرهم ! راه المغرب آ عباد الله هذا ماشي مصر و لا السودان و لا اليمن ! ايه طبعا تاحنا عندنا حقنا من القوادة د الميزوجينية و الباطرياكية و لكن ماشي بنفس الشكل لي كاين فدوك البلدان ! المغرب راه بلاد "مريم بنصالح" " خالدة عزبان" " سعيدة العمراني" بنات تزادو فعائلات لاباس عليها و هوما لي كايسيرو جزء كبير من رزق عائلاتهم بلا مانهضرو على الطبيبات بنات الاطباء و المحاميات بنات المحامون و و و و و…. مايمكنش تكون كاتب سيناريو و نتا ماعندكش فكرة حقيقية على الموضوع لي كاتكتب عليه و ماعارفش واش كاين فالمجتمع و لا ماكاينش و بأي حدة ! و ماعارفش اللغة لي خاص يهضرو بيها الشخصيات ديالك باش تكون عندهم مصداقية قدام المتلقي لي مافهمتش واش كايصحاب ليهم فراسو كاينة "خرية" راه كانعرفو الشركات و كانعرفو الناس لي لاباس عليهم و كانركبو فالطاكسيات و كانسمعو الحوارات بين الناس فالمارشيات و الطوبيسات و القهاوي و تيقو بيا انها بعيدا بزاف على شنو كانشوف هاد الايام فالتلفزة… بغيتو ترجعونا ليامات " غادي نطردك من العمل يا آنسة نوال" و " عطيني مفاتيح السيارة" و "جيبيلي الملف الازرق لي فيه الاعتمادات ديال الشركة" و هاد الجمل لي نقطع يدي ماكايقولها شي حد من غير فالمخلية د كتاب الحوار المغاربة
