اش بغى يقول بيان الحكومة. الريسطوات والكاباريات مفتوحين والتيرانات والمهرجانات يتسناو شوية والتنقل بين لحداش الليل والستة دالصباح مسموح بيه والباص ڤاكسينال مازال اجباري

بيان الحكومة اللي خرج هادي شوية خلى بزافت الامور ما واضحاتش. البيان قال باللي الحكومة قررات "اليوم الثلاثاء، رفع حظر التنقل الليلي بمجموع التراب الوطني ابتداء من يوم غد الأربعاء 10 نونبر 2021." هادا كيعني ان الحظر اللي كان بين لحداش الليل والستة الصباح ترفع. اللي بغى يخرج يخرج.
بيان الحكومة قال ان هاد القرار جا "تبعا لتوصيات اللجنة العلمية والتقنية، وتثمينا للنتائج الإيجابية التي تحققها "الحملة الوطنية للتلقيح" وانعكاسات ذلك على تحسن الوضعية الوبائية بالمملكة، واستنادا للمقتضيات القانونية المتعلقة بتدبير حالة الطوارئ الصحية".
البيان اوضح انه تقرر اتخاذ مجموعة تدابير أخرى تشمل مواصلة العمل بإلزامية الإدلاء "بوثيقة جواز التلقيح" أو "بشهادة الإعفاء من التلقيح"، للسفر إلى الخارج، والولوج لجميع الفضاءات المغلقة، من مقرات العمل، والمؤسسات السياحية والتجارية والمقاهي والمطاعم وقاعات الرياضة والحمامات، إلى غير ذلك من المرافق العمومية".
يعني هاد الشي ان المطاعم غادية ترجع تفتح كيف كانت قبل الجايحة. كاين للي كيسد مع لحداش بحال لقهاوي وكاين اللي كيسد حتى لطناش او الوحدة وكاين اللي كيسد حتى الصباح حسب المدن. يعني ان الكاباريات والريسطوات رجعو يخدمو كيف كان هاد الشي قبل كورونا.
طبعا كاينة امور جديدة بحال السماح "بإقامة الجنائز وتنظيم الحفلات والأفراح، في احترام تام للتدابير الاحترازية المعمول بها".
الاستثناء فهاد الشي هو لبلايص لكبيرة. هنا كيقصدو التيرانات والمهرجانات الفنية لكبيرة بحال موازين والصويرة.
هاد الشي كولو الحكومة قالت باللي راه الڤاكسان اجباري باش تدخل لهاد لبلايص.