علاش ما يتحاسبش وزير الصحة على هاد الوضعية الكارثية؟ 35 بالمائة من صحاب 75 عام والفوق ما داروش الڤاكسان ونصهم معمرين الانعاش دابا

فسرت مصادر طبية ل"كود" جوانب من الوضعية الوبائية الكارثية اللي كنعيشوها واللي كيموت فيها يوميا قرابة 100 مغربي بسباب كورونا.
مصادر "كود" كشفت رقما خطيرا يهم لمغاربة اللي عندهم 75 عام والفوق٬ فيه ان 35 بالمائة منهم ما داروش الڤاكسان. هذا اللي كيفسر٬ تضيف مصادر "كود"٬ ان حوالي 50 بالمائة من اللي معمرين الريانيماسيون =الانعاش= من هاد الفئة العمرية.
مصادر "كود" قالت باللي كاينين حتى صحاب فوق 50 عام وما ملقحينش وحتى هي نسبة فشي شكل.
هاد الشي اللي كيفسر علاش الڤيروس كيتحرك بزاف هاد ليام. المغرب باغي يوصل لنسبة 50 بالمائة من لمغاربة ملقحين. رقم نتوقعو نوصلو ليه منتصف شتنبر حسب البروفيسور عز الدين الابراهيمي.
لكن علاش وزارة الصحة ووزيرها بالخصوص غابر وهو المكلف بهاد الملف. خاصو يشرح للرأي العام علاش ما تلقحوش هادوك 35 بالمائة من كثر من 75 بالمائة٬ ثم خاصو يقتارح مقترحات باش تشجع لمغاربة اكثر على التلقيح.
دابا لقهاوي مفتوحين والمطاعم ووسائل النقل من طوبيسات وترام وكيران وطاكسيات وكاين تجمعات.... علاش ما يفرضش على اي واحد يدخل للقهوى او يمشي لوطيل او يركب فشي وسيلة نقل وسنو كثر من 18 عام٬ يكون عندو الباسبور سانيتير.
يولي اجباري فكاع الفضاءات العمومية والاماكن الخاصة حتى هي. الوزير اللي كيقدم مقترحات للحكومة قبل المصادقة عليها. شفناه ناعس وما على بالوش