بزاف ديال ليبازاريست و الفنادق و الرياضات و القهاوي مازال ماتعلموش من الدرس ديال كورونا بلي خاصهم يقدمو منتوج سياحي مناسب لجيوب المغاربة حيت الدوام هادا ! غي حلو عليهم شوية هوما يرجعو جاعرين باغين يضربوك فالأثمنة تاتنقز ! الكوا و الشوا

بزاف ديال الموثرين مؤخرا مشاو لتركيا ! تركيا لي ولات موضة هادي اكثر من عشر سنين، نجحات في انها تبقا فالطوندونس ديال موضة الاسفار و كلشي ولا كايحج ليها ! بلاد متقدمة ! شوارع ! طرقان ! سبيطارات ! متاحف !مولات ! وسائل نقل عمومية فالمستوى ! اماكن ترفيهية موجودة ! الحرية التامة للبنات و الدراري ! لبس لي بغيتي ! شرب لي بغيتي ! كول لي بغيتي ! دولة علمانية ماكاينينيش صحاب قال الله قال الرسول و من فوق هادشي عندهم عروض سياحية باثمنة مناسبة ! لوطيلات ! لريسطورات ! القهاوي ! الكاباريات ... و فاش تسالي و تبغي ترجع فحالاتك تشري الكادويات ليك و للفاميلة باثمنة مناسبة ! هادشي علاش كلشي كايقصد تركيا للسياحة !
حنا لا ! انا مثلا مشيت السيمانة لي فاتت لمراكش ! من كادخل و نتا كاتحس بلي شي وحدين باغين يهبطو ليك السروال ! الريسطورات ! لوطيلات ! الرياضات ! أما شي بازارات راه مايمكنش الاثمنة الخيالية لي دايرين ! براد عادي كايدير فالسوق خمسين درهم عند مول البازار غاتلقاه بماويخمسين درهم ! قزديرة مرسومة فيها شي تخربيقة ميات درهم ! محكة ديال الرجلين ماكاتسواش درهم كاتباع بعشرة دراهم ! ماكاين غير الزديح ! يطلقوك مالين البازارات يشدوك صحاب لوطيل يزدحوك تاهوما بشي اثمنة خيالية ! يطلقوك صحاب لوطيلات يشدوك شي صحاب الطواجن فستي فاضمة تاهوما فحالا مصايبين ليك الطاجين بلحم الترمة د كارداشيان !طاجين ديال رابعة د اللحم و نص بطاطا بسبعين درهم ! بلا مانهضرو على الگارديانات الشفارة لي ماكرهوش تعطيهم الكارط گيشي يتيريو لي بغاو هوما ! من كادخل و نتا كايتهبط ليك السروال الى حتى كاتشد لوطوروت باش ترجع فحالك !
و كايقوليك عاونو المنتوج الوطني، معامن غانتعاونو ؟ مع الگزارة ؟! مع وحدين كايشوفو فيك الشوفة ديال النمر فشي فريسة فأدغال الصاڤانا ؟
انا كنت كانقول مع راسي اكيد الناس لي خدامين فالقطاع السياحي غايكونو ترباو و ستافدو من الدرس ديال كورونا و بأنهم عرفوا قيمة السائح المغربي و بأنه السياحة الداخلية هي الدايمة ليهم ساعة العكس الاغلبية عاد زادو جعرو و بغاو يفديو الدقة ديال كورونا مضوبلة ! آ الكوا و الشوا ! و هادشي علاش غاتبقا السياحة المغربية متذبذبة عمرها تهز الراس حيت جوج ديال الحوايج ناقصينها : الحرية و المعقول!