راه معيورة للمغرب و المسؤولين على قطاع النقل أنه اوبير توقف النشاط ديالها حيت قطاع النقل غير مهيكل و ماكايسمحش بالمنافسة وخسارة كبيرة للزبون الكازاوي لي غايرجع عاوتاني عبد ديال مالين الطاكسيات فكازا

اوبير قررات رسميا توقف النشاط ديالها فالمغرب ! طبعا الخبر غايكون نزل بردا و سلاما على مالين الطاكسيات فكازا لي عوض مايفكرو يحسنو من جودة الخدمات ديالهم و يرضيو الزبون باش يشدوه عندهم كأي قطاع عادي كايخدم بقانون العرض و الطلب ، اختارو انهم يحاربو المنافسة ديال اوبير بالبلطجة و التسلگيط و الاجرام و يتلقاو للطوموبيلات ديالهم و يفرشخوهم و يكونو عصابة كاتسمي راسها ” الصقور البيضاء” لي خدمتها هي تشد أي طوموبيل خدامة مع اوبير و تتكرفص عليها و على مولاها ! و بقاو بقاو بقاو حتى طججو وحدة من أكبر الشركات فالعالم من المغرب و خلاو 300 شيفور لي كانو خدامين فيها شوماج! برافو عليكم آ ليزانديبيخيش ! ( كانهضر على البلطجية ماشي على مالين الطاكسيات المحترمين لي محتارمين راسهم و محتارمين المهنة ديالهم و لي للأسف قلال)
اوبير كتبات فالبلاغ ديالها أنها باغا تخدم فالمغرب و طور راسها هنا و لكن ماتقدرش تستثمر فبلاد فحال هادي لي فيها قطاع النقل غير مهيكل ! و قالت لينا ” سيرو تاتقادو قطاع النقل ديالكم و يولي كايقبل المنافسة و الابداع عاد نجيو نخدمو معاكم” !
من واحد الناحية أنا شخصيا كانتفهم القرار ديال اوبير ! آآآو راه بزاف عليهم ! شكون غايقدر يخدم فمناخ مقودة عليه تال هاد الدرجة !؟ شكون هاد الشركة المسخوطة لي غادي تستثمر فقطاع النقل؟ و هي كاتشوف راسها ضحية للبلطجة ديال الطاكسيات من جهة و لغياب القوانين التنظيمية لي كاتسمح بالتنافس فقطاع النقل من جهة أخرى.
واخا أنا كزبونة ديال مالين الطاكسيات و اوبير فكازا، كانشوف بلي الهروب ديال اوبير من هاد المدينة خسارة كبيرة بزاف ليا و لبزاف ديال الناس فحالي لي كانو كايخدمو بهاد لابليكاسيو و مستافدين منها ! و عاوتاني كانشوف راسي غانولي فريسة لمالين الطاكسيات الحومر لابغيت نمشي للمطار مع الربعة ديال الصباح و خاصني لي يوصلني لاگار ناخد التران ( كنت كانعيط لاوبير كايجي عندي تال الدار بسهولة) و لا لاكنت فالسينيما و خرجت معطلة ( كايخصني نشد طاكسي من هادوك القطاطعية لي كايوقفو حدا ميگاراما و كايشرطو عليك الطريفة ماكايخدموش الكونتور) ، و لا لاخرجت فالليل و سهرت خاصني فاش نسالي السهرة نشد طاكسي عاوتاني من هادوك لي كايكونو فعين الذياب و مع موالفين كايتعاملو مع بنات الليل كايصحابهم بلي گاع البنات لي كايخرجو يسهرو فالليل قحاب و حيت قحاب راه من حقهم يطاكسيوهم و يزيدو عليهم و لا مايخدموش معاهم الكونتور ( و شنو نتي مقصرة مع راسك و شوفي شكون للفيكتيم لي مضبر عليك و ماتعطيهش جطو تاهوا من القصارة ؟ هادي هي العقلية ديال الاغلبية الساحقة ديالهم ) ! أما لا مشيتي للموروكو مول و بغيتي تشد طاكسي باش تدخل فحالاتك للدار مصيبة كحلة حيت كاتلقاهم مستفين و كايتشرطو عليك فين و كيفاش و شحال غاتخلصي !
أما اذا كنتو عائلة او جوج أو ثلاتة ديال الناس ديك الساعة غير نساو حيت هوا كايفضل يهز واحد بواحد !
وعاوتاني الزبون الكازاوي غايرجع فيكتيم ! غايرجع فريسة لمالين الطاكسيات ! لديك ” لا ماغاديش للمعاريف ” ” لا غاندوز على غاندي ” ” لا ساليت ” ” لا داخل للدار ” ” لا ماكاندخلش للزناقي غانحطكم فالشاريع ” ” لا كاين الزحام تما ” ” لا كاينين الفوروجات” ” لا ماغانخدمش الكونتور” ” لا نتوما ثلاتة ماغانهزكمش” ” لا حطي باليزتك حداك الكوفر عامر بالسطولة د الحمام د المدام”
لا لا لا! لدرجة وليتي فاش كاتوقف الطاكسي خاصك تسعاه باش يديك و تدروش و ترغب و عافاك آ خويا و غير شوف كي دير و واخا تحطني غير هنا و وهوا كايتعنگر عليك و يتجيبد و يتبيندر ! فحالا غايديك فطوموبيلت باه ! و لا !غايديك فابور غا داير فيك خير !
غايولي عاوتاني الزبون ضحية لبعض الشيافر الشفارة لي الأغلبية ديالهم ماكايطبقوش الحد الادنى ديال لاكورس لي هوا 7.5 دراهم و كايقطع ليك 8 دراهم و كايميك و أغلبية الزبائن كايخليوهم ! و نتا كزبون غير كايفوت ليك الكونتور 0.50 كايآرودنيها للدرهم ! لاكانت 13.6 كاتولي 14 !!
الشيافر لي ماكايحتارموش القانون و كايطلعك نتا و هدا و لاخور ! و هو عارف بلي قانونيا فلاكورس خاصك تهز زبون واحد و تديه للبلاصة لي بغا.
الشيافر لي ديما ماعندهمش الصرف ديال عشرين درهم ! و ديال خمسين درهم ! أما ميات درهم و ميتين درهم كايبغي يتيري فيك لاجبدتيها ليه ! آه هوا كايقولك سير صرف عاد طلع ! سير قلب على الصرف عاد آجي عندي فحالا نتا مطلوب منك كزبون تكون دزتي فرشتي كارطونة حدا شي جامع واحد ساعة د الماگانة و سعيتي الجدريالات و الدراهم عاد طلع فطاكسي ! (اوبير تقدر تخلص بلاكارط گيشي)
الشيافر لي كايكونو حدا كازا بور و لي ماكايتحركوش لاماجمعوش ثلاتة ديال الناس و كايخليوك منشووووور كاتساين تايجمع هوا ثلاتة غادين فطريقو عاد يقلع !
الشيافر لي كايطلعو للطاكسي لابسين الشورطات و خانزين بريحة العرق فالصيف دون ادنى احترام للزبون !
بلا مانهضرو على التحرش و التصرفات الغير اللائقة و قلة الأدب و الهندام و الحالة الميكانيكية ديال شي خرشاشات كون كانو فشي بلاد كاتحتارم راسها كون لاحو دينمهم فلافيراي شحال هادي غي على الثلوت السمعي البصري الهوائي لي كايتسببو فيه.
بلا مانهضرو على التوريست لي كايعانيو من هاد النصب لي كايتمارس عليهم من مالين الطاكسيات و كايحلفو مايعاودو يحطو رجلهم فالمغرب.
مؤخرا واحد مول الطاكسي قلت ليه ديني لسيدي معروف قاليا ” لا ختشي عندي عقدة من سيدي معروف” ! وا شوف التقحبين كي داير !؟
و هادشي كامل فشكون كاتجي الدقة ؟
كاتجي الدقة فالزبون ! لي كايخلص فلوسو و كايتم التعامل معاه كحشرة !
راه مايمكنش يبقا قطاع النقل بهاد المستوى المتدني ! بهاد الشيافر لي ماعندهمش أدنى فكرة على ” ارضاء الزبون” لي كايصحاب ليهم الطاكسيات راهم طوموبيلات ديالهم خاصة و آخر همهم هي راحة الزبون.
البلاغ ديال اوبير راه معيورة للمغرب و للمسؤولين على قطاع النقل و لي ماقادينش يدخلو لهاد الشونتيي و يخدمو عليه و يحرروه من سلطة المأذونيات و الريع و التخوفيش ! و معيورة لديك كوب 22 لي المغرب نظمها و خدمات فيها اوبير بسيارات صديقة للبيئة ! قطاع النقل راه خاصو يتخوصص و تحضر فيه المنافسة باش يتحسن و تتزاد الجودة و مرحبا باوبير و مرحبا بالشركات الخاصة و مرحبا بأي حاجة كاتصب في مصلحة الزبون و غاتقدم ليه عروض لي كاتناسبو و كاتحتارمو عوض مايبقا الحلقة الأضعف فقطاع مول الگريمة كايستغل لي كاريها لي كايستاغل الشيفور لي كايستغل بدورو الزبون …